Azərbaycan Prezidenti İlham Əliyev Ermənistanın otuz ilə yaxın davam edən işğalçılıq siyasətinə və Qarabağda törətdiyi kütləvi dağıntılara qarşı beynəlxalq birliyin nümayiş etdirdiyi laqeydliyi kəskin ittihamlarla diqqətə çatdırıb.
1xeber.media xəbər verir ki.dövlət başçısı bildirib ki, dünya birliyi və aparıcı beynəlxalq təşkilatlar Ermənistanın Azərbaycan torpaqlarını talan etməsinə, şəhər və kəndləri xəritədən silməsinə düz 30 il boyunca sadəcə göz yumub və səssiz qalıb.
Prezident İlham Əliyev məsələnin pərdəarxası məqamlarına toxunaraq bildirib ki, bu sükut təsadüfi olmayıb. Ermənistanın arxasında dayanan, onlara havadarlıq edən bəzi böyük dövlətlər işğalçı tərəfin beynəlxalq hüquqa zidd bütün əməllərini, vandalizm aktlarını və humanitar cinayətlərini ört-basdır etmək üçün fəal şəkildə çalışıblar. Bu yanaşma münaqişənin uzun illər boyu dondurulmuş vəziyyətdə qalmasına və təcavüzkarın cəzasızlıq sindromundan yararlanmasına şərait yaradıb.
