“Burger King”in Azərbaycanda fəaliyyət göstərən filiallarının keçmiş əməkdaşları artıq 3 ildir əməkhaqlarını ala bilmədiklərini iddia edirlər.
1xeber.media xəbər verir ki,bu barədə Bakupost-un redaksiyasına 50-yə yaxın keçmiş işçi müraciət edib.
Onların sözlərinə görə, işçilər 2017-2018-ci ildən “Anar Food” MMC-nin tərkibində fəaliyyət göstərən “Burger King” restoranlar şəbəkəsində rəsmi əmək müqaviləsi ilə çalışıblar. Şirkətdə yaranan maliyyə problemlərindən sonra 2023-cü ildə restoranların fəaliyyəti qəfil dayandırılıb və işçilər əvvəlcədən xəbərdar edilməyib.
Keçmiş əməkdaşların iddiasına görə, şirkətin əvvəlki rəhbəri Mirzə Abbas Hikmətoğlu müəssisəni başqa şəxsə satdıqdan sonra əldə edəcəyi vəsait hesabına əməkhaqlarını ödəyəcəyini, həmçinin yeni rəhbərliyin onları işlə təmin edəcəyini bildirib.
Lakin onlar bu günə qədər nə əməkhaqlarını ala bildiklərini, nə də yeni rəhbərlik tərəfindən işə götürüldüklərini deyirlər.
İşçilər bildirirlər ki, onların apardığı araşdırmaya görə, şirkət Azərbaycanda KFC, Pizza Hut və Simit Sarayı restoranlar şəbəkəsinin rəsmi idarəedicisi və sahibi olan “GFC” MMC-yə satılıb.
9 aylıq əməkhaqqının ödənilmədiyini bildirən Rüfət Əlimərdanov şirkətdə əvvəlcə müdir, daha sonra isə ərazi meneceri vəzifəsində çalışdığını deyir:
“2023-cü ildə şirkətin fəaliyyəti bir gündə tamamilə dayandı. Aylarla yığılan əməkhaqlarımız ödənilmədi. “Anar Food” MMC-nin sahibi Abbas Hikmətoğlu artıq 3 ildir ki, bu ödənişləri etmir. Zəng vurduqda satdığı şirkətdən pulu tam almadığını, pulu aldıqda ödəniş edəcəyini deyir. Lakin konkret tarix bildirmir. Qruplaşmalar şəklində bütün qurumlara müraciət etmişik, lakin şikayətimizə baxılmır”.
Direktor vəzifəsində çalışmış Ülvi Bünyatov ona rəsmi olaraq 12 500 manat əməkhaqqı və digər ödənişlərin verilməli olduğunu bildirir. Onun sözlərinə görə, işçilər 2024-cü ilin sonlarına qədər əmək müqaviləsi üzrə sistemdə saxlanılıb, daha sonra isə onların xəbəri və razılığı olmadan müqavilələrinə xitam verilib:
“Mənə ödənilməli olan ümumi məbləğ 12 500 manatdır. Bunun üzərinə qanunvericiliyə əsasən gecikdirilən hər gün üçün hesablanan ödənişlər, təzminatlar və digər məbləğlər də əlavə olunur.Bizi uzun müddət sistemdə saxlayırdılar, işdən çıxarmırdılar ki, gedib başqa yerdə işləyək.
Abbas Hikmətoğlu əvvəllər işçilərlə birbaşa əlaqə saxlayaraq ödənişlərin ediləcəyini deyirdi. Son zamanlar isə ümumiyyətlə zənglərə cavab vermir. Təzminatlar və digər ödənişlərlə birlikdə mənə olan borcun son hesablamada təxminən 60 min manata çatdığını deyə bilərəm. Mənim kimi təxminən 50 işçi var və onların da pulları ödənilməyib”.
Şirkətdə İnsan Resursları üzrə çalışmış Səbinə Məmmədova isə 18 674 manat əməkhaqqının və 145 günlük istifadə edilməmiş məzuniyyətinə görə ödənişin verilmədiyini bildirib. O qeyd edib ki, pandemiya dövründə bir neçə ay işləməyib, daha sonra ticarət mərkəzlərinin fəaliyyətini bərpa etməsi ilə işinə davam edib:
“Restoranın ticarət mərkəzlərində olan filiallarında iş gedirdi. Mən evdən hesabatlar aparır, sənədlər hazırlayırdım. Bir neçə ay işlədim, amma pul verilmədi. Digər filiallarda işləyən əməkdaşların da maaşları tam ödənilmirdi. Sadəcə 30-50 faizini alırdılar. Qalan məbləğlərlə bağlı Abbas bəy deyirdi ki, sonra ödəyəcək. Lakin sonra nə mən, nə də onlar heç nə ala bildik. Mühasib işdən çıxanda mənimlə hesablaşdı və Abbas bəyin mənə 18 674 manat ümumi borcunun olduğunu bildirdi”.
Digər keçmiş əməkdaşlardan Sergey Pavloviç Tişakov təxminən 24 min manat, Şakir Fədai oğlu Əlihəsənov 3 500-3 900 manat, Vasim Muradov isə 3 500 manat alacağının olduğunu bildiriblər.
Müraciət edən şəxslər məsələ ilə bağlı Dövlət Əmək Müfəttişliyi Xidmətinə, prokurorluğa və Ombudsmana müraciət etdiklərini, lakin bir nəticə olmadığını bildirirlər.
bakupost şirkətin keçmiş rəhbəri Mirzə Abbas Hikmətoğlu ilə əlaqə saxlayıb. O, işçilərin əməkhaqları ilə bağlı suallarımızı cavablandırmadan artıq həmin şirkətlə çalışmadığını deyərək telefonu söndürdü.
Məsələ ilə bağlı Dövlət Əmək Müfəttişliyi Xidmətinə sorğu göndərmişik.
