Dövlət Proqramının icrası çərçivəsində işğaldan azad edilmiş ərazilərdə dağ-mədən sənayesinin inkişafında yeni mərhələ başlayır.
1xeber.media xəbər verir ki, bunu "AzerGold" QSC İdarə Heyətinin sədri Zakir İbrahimov bu gün keçirilən brifinqdə deyib.
O bildirib ki, Qarabağ və Şərqi Zəngəzurda yerləşən qiymətli və əlvan metal yataqları Dövlət Proqramının əsas prioritetlərindəndir:
"Hazırda Ağdərə rayonunun Canyataq kəndi ərazisində yerləşən "Dəmirli" mis mədənində istismar işlərinə başlanılıb. Kəlbəcər rayonunda isə yaxın dövrdə hasilatın başlanması nəzərdə tutulur.
Zəngilan rayonunda mövcud ehtiyatların müasir geoloji üsullarla yenidən qiymətləndirilməsi, resurs bazasının dəqiqləşdirilməsi və gələcək hasilat üçün zəruri texniki və infrastruktur işləri görülür.
Qarabağla yanaşı, ətraf rayonlarda da böyük mineral resurs potensialı mövcuddur. Bu səbəbdən ən müasir geoloji texnologiyalar tətbiq edilməklə genişmiqyaslı kəşfiyyat işlərinə start verilib və yeni yataqların müəyyənləşdirilməsi hədəflənir".
Zakir İbrahimov Naxçıvan Muxtar Respublikasının da Dövlət Proqramının mühüm istiqamətlərindən biri olduğunu vurğulayıb.
Onun sözlərinə görə, Naxçıvanda həm sovet dövründə, həm də sonrakı illərdə geoloji kəşfiyyat işləri kifayət qədər aparılmayıb:
"Bu bölgəmiz də yüksək mineral potensiala malikdir və burada geoloji kəşfiyyat işlərinin geniş şəkildə başlanması Dövlət Proqramının mühüm istiqamətlərindən biridir".
Sədr bildirib ki, sentyabrın 22-də keçirilmiş müşavirədə Prezident tərəfindən bu istiqamətlər üzrə konkret vəzifələr müəyyənləşdirilib.
"Xüsusilə mövcud yataqların müasir üsullarla yenidən qiymətləndirilməsi, geoloji kəşfiyyat işlərinin genişləndirilməsi, filizdən son məhsula qədər tam istehsal zəncirinin formalaşdırılması və sahəyə özəl investisiyaların cəlb edilməsi əsas istiqamətlər kimi diqqətə çatdırılıb", - deyə o əlavə edib.
Zakir İbrahimovun sözlərinə görə, Dövlət Proqramının qəbul edilməsi qlobal iqtisadiyyatda dağ-mədən sənayesinin rolunun dəyişdiyi bir dövrə təsadüf edir. Yaşıl enerji keçidi, elektrikləşmə, rəqəmsallaşma və yüksək texnologiyaların inkişafı mis, sink, qurğuşun, dəmir və digər metal filizlərinə, eləcə də kritik mineral xammala tələbatı artırır.
Z.İbrahimov qeyd edib ki, qlobal təchizat zəncirlərinin dayanıqlılığı və mineral resursların təhlükəsizliyi məsələləri də getdikcə daha çox ön plana çıxır./Oxu.az
