Xəbər verdiyimiz kimi, Azərbaycan Prezidenti İlham Əliyev sentyabrın 25-də dünyanın aparıcı investisiya şirkətlərindən üçünün rəhbərləri ilə görüşüb. Söhbət “Neuberger Berman”, “Brookfield Asset Management” və “Global Infrastructure Partners” şirkətlərindən gedir.
1xeber.media xəbər verir ki, bu şirkətlər qlobal maliyyə bazarında yüz milyardlarla, hətta trilyonlarla dollar həcmində aktivlərin idarə edilməsində iştirak edir, enerji, nəqliyyat, rəqəmsal infrastruktur, daşınmaz əmlak və özəl kapital kimi strateji sahələrə investisiyalar yatırırlar.
Sentyabrın 25-də İlham Əliyev əvvəlcə “Neuberger Berman” şirkətinin sədri və baş icraçı direktoru Corc Volkeri, daha sonra “Brookfield Asset Management”in baş icraçı direktoru Konnor Teskini və “Global Infrastructure Partners”in təsisçisi, sədri və baş icraçı direktoru Adebayo Oqunlesini qəbul edib.
“Neuberger Berman” – 613 milyard dollarlıq aktivləri idarə edən şirkət
Prezident İlham Əliyevin qəbul etdiyi şəxslərdən biri ABŞ-ın aparıcı investisiya şirkətlərindən olan “Neuberger Berman”ın sədri və baş icraçı direktoru Corc Volker olub.
1939-cu ildə Nyu-Yorkda yaradılan “Neuberger Berman” hazırda dünyanın iri müstəqil investisiya idarəetmə şirkətlərindən biridir. Şirkətin idarə etdiyi aktivlərin ümumi həcmi 613 milyard ABŞ dollarına çatır. Onun özəl bazarlar platforması isə 170 milyard dollardan çox investisiya öhdəliyini idarə edir və portfelində dünya üzrə 10 400-dən çox şirkət yer alır.
Şirkət özəl kapital, özəl borc, səhmlər, istiqrazlar və digər investisiya alətləri ilə işləyir.
“Neuberger Berman” Azərbaycan üçün də yeni tərəfdaş deyil. Azərbaycan Respublikası Dövlət Neft Fondu ilə şirkət arasında əməkdaşlıq 2016-cı ildən davam edir. Prezident İlham Əliyevlə Corc Volkerin görüşündə də bu əməkdaşlığın nəticələri, yeni investisiya layihələri və uzunmüddətli tərəfdaşlığın genişləndirilməsi imkanları müzakirə olunub.
“Brookfield Asset Management” – aktivləri 1 trilyon dolları ötən nəhəng
Digər görüş “Brookfield Asset Management” şirkətinin baş icraçı direktoru Konnor Teski ilə keçirilib.
“Brookfield”in tarixi 1899-cu ildə Braziliyanın San-Paulu şəhərində yaradılmış kommunal xidmət şirkətinə gedib çıxır. Bu gün isə “Brookfield Asset Management” dünyanın ən böyük alternativ investisiya və real aktiv idarəetmə şirkətlərindən biri hesab olunur.
Şirkətin idarə etdiyi aktivlərin həcmi 1 trilyon ABŞ dollarını ötür. “Brookfield” 50-dən çox ölkədə fəaliyyət göstərir və indiyədək 2 mindən artıq qlobal investisiya həyata keçirib.
Şirkətin əsas fəaliyyət istiqamətləri infrastruktur, bərpaolunan və ənənəvi enerji, daşınmaz əmlak, özəl kapital və kredit bazarlarıdır.
“Brookfield”in infrastruktur miqyasını rəqəmlər də göstərir. Şirkətin platformasına 308 mindən çox telekommunikasiya obyekti, 77 min kilometr fiber-optik şəbəkə, 150 data mərkəzi, 36 300 kilometrlik dəmir yolu infrastrukturu və 3 200 kilometr ödənişli avtomobil yolu daxildir. Onun kommunal infrastruktur biznesləri dünyada 10 milyondan çox istehlakçıya xidmət göstərir.
Prezident İlham Əliyevlə Konnor Teskinin görüşündə Azərbaycan Dövlət Neft Fondu ilə “Brookfield Asset Management” arasında imzalanmış uzunmüddətli strateji əməkdaşlığa dair niyyət protokolunun əhəmiyyəti vurğulanıb.
Tərəflər enerji keçidi, bərpaolunan enerji, enerji saxlanc sistemləri və rəqəmsal infrastruktur sahələrində mümkün investisiya layihələrini də müzakirə ediblər.
GIP – hava limanlarından data mərkəzlərinə qədər iri infrastruktur investoru
Prezidentin qəbul etdiyi üçüncü şəxs “Global Infrastructure Partners”in təsisçisi, sədri və baş icraçı direktoru Adebayo Oqunlesi olub.
2006-cı ildə ABŞ-də yaradılan GIP qlobal infrastruktur investisiyaları üzrə ixtisaslaşıb. Şirkətin idarə etdiyi aktivlərin dəyəri təxminən 170 milyard ABŞ dollarıdır.
GIP-in investisiya portfeli xüsusilə nəqliyyat, enerji, hava limanları, dəmir yolları, limanlar və data mərkəzləri kimi iri infrastruktur obyektlərini əhatə edir.
Şirkətin investisiya etdiyi aktivlər arasında Londonun Qatvik hava limanı, Edinburq və Sidney hava limanları, İtaliyanın “Italo” sürətli dəmir yolu operatoru, Böyük Britaniyanın “Peel Ports” liman operatoru, Avstraliyanın Melburn limanı və “CyrusOne” data mərkəzi operatoru kimi iri şirkət və obyektlər var.
GIP 2024-cü ildən etibarən dünyanın ən böyük aktiv idarəetmə şirkətlərindən biri olan “BlackRock”un strukturuna daxildir. “BlackRock” GIP-i təxminən 3 milyard dollar nağd vəsait və təxminən 12 milyon “BlackRock” səhmi müqabilində əldə edib və əməliyyat 2024-cü ilin oktyabrında tamamlanıb.
“BlackRock”un özünün idarə etdiyi aktivlərin həcmi isə 30 iyun 2026-cı il tarixinə 15,3 trilyon ABŞ dolları göstərilib.
Azərbaycanla GIP və “BlackRock” arasında hansı layihələr var?
Azərbaycanın GIP və “BlackRock”la əməkdaşlığı artıq yalnız danışıqlar səviyyəsində deyil.
Davosda Azərbaycan Dövlət Neft Fondu, “BlackRock” və GIP arasında uzunmüddətli əməkdaşlığa dair niyyət protokolu imzalanıb. Razılaşma çərçivəsində üç-dörd il ərzində GIP-in idarə etdiyi infrastruktur fondlarına və birgə investisiya layihələrinə 1,5 milyard ABŞ dollarına qədər vəsait yatırılması imkanının nəzərdən keçirilməsi nəzərdə tutulur.
Bundan başqa, Azərbaycanda data mərkəzlərinin yaradılması, süni intellekt və bulud texnologiyalarına xidmət edə biləcək rəqəmsal infrastrukturun qurulması, eləcə də hava limanı infrastrukturu üzrə investisiya imkanlarının araşdırılması razılaşdırılıb.
ARDNF artıq GIP ilə birgə beynəlxalq layihələrdə iştirak edir. Fond İtaliyanın “Italo” sürətli dəmir yolu operatoruna 34,5 milyon avro, Londonun Qatvik hava limanına isə GIP ilə birgə 50 milyon funt sterlinq investisiya yatırıb.
Beləliklə, Prezident İlham Əliyevin sentyabrın 25-də qəbul etdiyi üç şirkət – “Neuberger Berman”, “Brookfield Asset Management” və GIP – dünya investisiya bazarının iri iştirakçılarıdır. Onların Azərbaycana marağı isə əsasən enerji keçidi, nəqliyyat və logistika infrastrukturu, data mərkəzləri, süni intellekt infrastrukturu və uzunmüddətli beynəlxalq investisiya layihələri üzərində cəmləşir.lent.az
