Bu gün, 15 oktyabr 2026-cı il tarixində Bakının ev sahibliyi etdiyi Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Toplantısı təkcə regional məsələlərin müzakirəsi ilə deyil, Azərbaycan liderinin dünyaya və Ermənistanın havadarlarına ünvanladığı kəskin, dərin mesajlarla yaddan qaldı.
Sammitin kürsüsündən çıxış edən Prezident İlham Əliyev post-münaqişə dövrünün reallıqlarını və ölkəmizin diplomatik iradəsini bəyan edən bir sıra fundamental tezislər irəli sürdü.
Beynəlxalq riyakarlığın ifşası və Minsk qrupunun tabutu
Azərbaycan Prezidenti çıxışında 30 illik işğal dövründə beynəlxalq təşkilatların sərgilədiyi laqeydliyi növbəti dəfə sərt dillə tənqid atəşinə tutdu. Dövlət başçısı qeyd etdi ki, əgər Ermənistanın soyqırımı və etnik təmizləmə siyasətinə vaxtında qlobal sanksiyalarla cavab verilsəydi, Azərbaycan beynəlxalq hüququ döyüş meydanında təkbaşına bərpa etmək məcburiyyətində qalmazdı .
BMT Təhlükəsizlik Şurasının qətnamələrini kağız üzərində qoyan, Avropa Parlamenti və Avropa Şurası kimi anaxronizm nümunəsi olan qurumların təcavüzkarı necə həvəsləndirdiyi Bakıdan dünyaya bir daha elan olundu. ATƏT-in Minsk qrupunun isə məsələni inhisara alaraq münaqişəni dondurmağa xidmət etdiyi faktlarla ifşa edildi.
Havadarların strateji korluğu: "Hamısı yanıldı!"
İlham Əliyev 2020-ci ilin Vətən müharibəsi və 2023-cü ilin antiterror tədbirləri zamanı Ermənistanın Qərbdəki yeni müdafiəçilərinin böyük bir hesablama səhvi etdiyini diqqətə çatdırdı.
Ali Baş Komandan bildirdi ki, İrəvanın arxasında dayanan xarici qüvvələr Azərbaycanın öz torpaqlarını və suverenliyini güc yolu ilə bərpa edəcəyinə inanmırdılar. Azərbaycan xalqının milli qürurunu, azadlıqsevər xarakterini və əxlaqi dəyərlərini tanımayan bu güclərin hamısı strateji cəhətdən tamamilə yanıldı.
Bakıdakı "Müasir Nürnberq" və separatçıların aqibəti
Çıxışın ən səs-küylü məqamlarından biri Qarabağdakı qondarma rejimin rəhbərlərinin və uşaq qatillərinin Azərbaycan ədaləti qarşısına çıxarılması ilə bağlı oldu. Prezident bu prosesi mahiyyətinə görə faşizm üzərində qurulmuş Nürnberq tribunalının müasir analoqu adlandırdı.
Vaxtilə tanklarla Bakını zəbt edəcəklərini deyib hədə-qorxu gələnlərin bu gün Azərbaycan həbsxanalarında çay içdiyini, onların lovğalandığı hərbi texnikaların isə Hərbi Qənimətlər Parkında məğlubiyyət simvolu kimi qaldığını kəskin şəkildə vurğuladı.
Qalib dövlətin humanizmi: Kövrək sülhü qorumaq missiyası
Azərbaycan müharibədə mütləq qələbə qazanaraq işğalçıları qovsa da, dövlət başçısı xalqımızın yüksək mənəvi keyfiyyətlərini ön plana çəkdi
Bildirildi ki, Azərbaycan 30 illik dağıntılara rəğmən barbarların səviyyəsinə enməyib, məğlub vəziyyətdə olana zərbə vurmayıb və intiqamçılıq etməyib
Əksinə, rəsmi Bakı qarşı tərəfə sülh təklif edib. Regionda artıq bir ildən çoxdur sabitliyin hökm sürdüyünü deyən İlham Əliyev mühüm bir xəbərdarlıq da etdi: "Bu sülh hələ də kövrəkdir, onu qorumaq və möhkəmləndirmək lazımdır"
Avrasiyanın rəqəmsal və loqistik gələcəyi: Bakı Bəyannaməsi
Sammit təkcə siyasi bəyanatlarla bitmədi, həm də Azərbaycanın sədrlik fəlsəfəsinin uğuru olan tarixi Bakı Bəyannaməsinin qəbulu ilə nəticələndi Bu sənəd nəqliyyat koridorlarının (Orta Dəhliz), enerji marşrutlarının və rəqəmsal bağlantıların təhlükəsizliyini təmin edən bir yol xəritəsidir.
Həmçinin dünyada ilk dəfə olaraq belə böyük bir sammitin sənədində süni intellektin gətirdiyi risklər və imkanlar yer alıb ki, bu da Azərbaycanın texnoloji diplomatiyada trendləri necə qabaqladığının bariz sübutudur.
Aidə Tofiqqızı
