“Sözügedən dəyişikliyi qiymətləndirərkən mövzuya bir neçə aspektdən yanaşmaq mütləqdir. Belə ki, qanunvericiliyə edilən dəyişikliyin, ilk növbədə, valideynlərini itirmiş və valideyn himayəsindən məhrum olmuş uşaqların sosial müdafiəsinin gücləndirilməsini hədəflədiyini vurğulamalıyıq. Bu addım sosial hüquqların genişləndirilməsi və cəmiyyətdəki ən həssas qrupların qorunmasına yönəlmiş önəmli bir təşəbbüsdür”.
Bu sözləriaçıqlamasında ekspert Mehti Kamiloğlu deyib.
O, "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” Azərbaycan Respublikasının Qanununa edilən dəyişikliyə münasibət bildirib.
Mehti Kamiloğlu qeyd edib ki, qanunvericiliyə edilmiş dəyişikliyə görə, bundan sonra yalnız hər iki valideyni vəfat etmiş və ya bir valideyni əlil olan uşaqlar deyil, həm də müxtəlif sosial və hüquqi vəziyyətlərdə olan uşaqlar (məsələn, cəzaçəkmə müəssisələrində olan və ya valideynlik hüquqlarından məhrum edilmiş şəxslərin uşaqları) valideyn himayəsindən məhrum olmuş sayılacaq. Bu isə daha çox uşağın bəhs olunan sosial təminatlardan yararlanmasına şərait yaradacaq.
"Dövlət və özəl təhsil müəssisələrində təhsil alan valideynlərini itirmiş və valideyn himayəsindən məhrum uşaqların təhsil haqqı dövlət büdcəsindən ödəniləcək ki, bu da onların təhsildən kənar qalmasının qarşısını alacaq və onlara bərabər təhsil imkanları yaradacaq. Xüsusilə də, ödənişli və ya ödənişsiz təhsil almalarından asılı olmayaraq, bu uşaqlara verilən əlavə təqaüdlər onların maddi çətinliklərinin aradan qaldırılmasına kömək edəcək və dərslərinə daha yaxşı hazırlaşmaları üçün stimul olacaq.
Eyni zamanda, dərslik və dərs ləvazimatları üçün ödənilən müavinət və təhsil müəssisələrini bitirən zaman verilən müavinətlər uşaqların sosial adaptasiyasını asanlaşdıracaq və onların gələcəkdə iş bazarına inteqrasiyasına dəstək olacaq", - ekspert əlavə edib.
M.Kamiloğlu onu da vurğulayıb ki, 2024-cü il Azərbaycanın təhsil həyatında mühüm faktlarla yadda qalıb:
"Azərbaycan Respublikasının Prezidenti İlham Əliyev təhsil sisteminin müasirləşdirilməsini və beynəlxalq standartlara uyğunlaşdırılmasını Azərbaycanın inkişafının prioritet istiqamətlərindən biri hesab edir və qeyd olunan yöndə iti, strateji addımlar atır. Elə 2020-ci ildə ölkə başçısının Emin Əmrullayevi təhsil naziri vəzifəsinə təyin edilməsilə əlaqədar qəbulu çərçivəsində söylədiyi bu fikir onun təhsilə olan həssas yanaşmasının əyani göstəricisidir: "Təhsil ölkəmizin ümumi inkişafına uyğun şəkildə inkişaf etməlidir və ən müasir tələblərə cavab verməlidir". Həmin tezisin 2024-cü ildə özünü doğrultmasının bir daha şahidi olduq. Nümunə olaraq, Qarabağ Universitetinin, Türkiyə-Azərbaycan Universitetinin və İtaliya-Azərbaycan Universitetinin fəaliyyətə başlamasını göstərə bilərik. Hər üç universitetə builki tələbə qəbulu üzrə yüksək nəticələr təhsillə bağlı ancaq nikbin düşüncələr formalaşdırır. Daha bir önəmli fakt kimi isə "Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”nın müddətinin uzadılmasını göstərə bilərəm. Bildirim ki, sözügedən proqram çərçivəsində hazırda dünyanın 140 ali təhsil müəssisəsində 1000-dək vətəndaşımız təhsil alır".
Publika.az
