“Qədim dövrlərdə olduğu kimi, müasir zəmanəmizdə də uzaqgörənlər, gələcəkdən xəbər verənlər az deyil. Xüsusən də sosial şəbəkələrdə özlərini “ekstrasens”, “medium”, “cadugər” və s. adlandıranlar tez-tez qarşımıza çıxır. Bəziləri bunun haram, bəziləri Allah vergisi, bəziləri də tam izahı olunmayan təbiət hadisəsi olduğunu iddia edirlər. Ortada isə bir həqiqət var – yuxarıda sadaladıqlarımız şəxslər həmişə olublar”.
Bu sözləri kliniki psixoloq, ekstrasens Zirəddin Rzayev deyib.
O, hər sahədə olduğu kimi, burada da dələduzların mövcudluğunu qeyd edib:
“Bu sahələrdə əksəriyyəti dələduzlar təşkil etsələr də, bəzən elələri olur ki, bizləri düşünməyə vadar edir. Buna misal olaraq dünya şöhrətli Vanqanı, amerikalı Edqar Keysini, Nostradamusu göstərmək olar. Ola bilsin, adlarını çəkdiyimiz tanınmış qeyri adi və birmənalı qarşılanmayan kəslərə inanmayanlar da olsun. Bu, normaldır. Təbii ki, hər kəsin belə insanlara öz yanaşması var. Ancaq ortada olan bir həqiqət də var ki, o da Nostradamusun, Vanqanın, Edqar Keysi kimi fövqəltəbii insanların tarixdə buraxdığı izlərdir. Çünki onlara təkcə zəmanələrinin cahil insanları deyil, eyni zamanda dövlət rəhbərləri, məmurlar, o cümlədən alim və tarixi şəxsiyyətlər də müraciət edib, inanıblar. Adlarını çəkdiyimiz şəxslər tarixə düşməyi də bacarıblar. Məsələnin dini, fəlsəfi və siyasi tərəflərini sonrakı görüşümüzə saxlayaq”.
Z.Rzayev deyib ki, məqsədi gerçək ekstrasensləri, mediumları dələduzlardan ayırmaq və ortaya sübutlar qoymaqdır:
“Necə deyərlər, “izah olunmazdır, ancaq həqiqətdir”. Baxmayaraq ki, hər kəsin öz həqiqəti var, lakin əsl həqiqət qarşısında hər kəs acizdir. Hansı həqiqətlərlə “ekstrasens” adlandırdığımız fövqəladə şəxsləri dələduzlardan ayırmaq olar, gəlin məntiqlə araşdıraq:
1. Ekstrasenslər öncədən verdikləri proqnozlarla tanınmalıdırlar;
2. Onlar kütləvi informasiya vasitələrinin diqqətini özlərinə cəlb etməlidirlər. Yəni verdikləri proqnozlar diqqətləri cəlb etməlidir ki, bu da kütləvi informasiya vasitələrinin marağına səbəb olsun;
3. Proqnozlar ümumi və ehtimal olunan olmamalıdır. Yəni sosial şəbəkə “qəhrəmanları” həmişə ümumi proqnozlarla ictimaiyyətdə ciddi qarşılanmırlar və eyni zamanda onlara intellektual səviyyəsi aşağı olan təbəqələr inanırlar”.
Zirəddin Rzayevin dediklərinə görə, əsl ekstrasenslər tez-tez proqnozlar vermirlər:
“Onların verdikləri proqnozlar ildə bir və ya iki dəfə olur.
1. Əsl ekstrasenslər dövlət nəzarətində olurlar, dövlətin onlara qarşı xüsusi və həssas münasibətləri olur.
2. “Ekstrasensəm” deyən şəxsin ən azından bir və ya bir neçə cinayət hadisəsinin üstünün açılmasında xidmətləri olmalıdır.
3. Ekstrasens elə proqnozlar verməlidir ki, həmin proqnozlar ümumi olmamaqla yanaşı eyni zamanda məntiqə də tabe olmasın. Yəni özünü doğruldacaq olan proqnozlar insanları heyrətləndirməlidir, məntiq və təsadüflərə əsaslanmamalıdır.
4. Kimlərsə hansısa “ekstrasensi” təriflədi deyə onlara inanmaq ən zəif sübutlardan biridir. Yalnız və yalnız kütləvi informasiya vasitələrində yer alan və izahı olunmayan heyrətləndirici proqnozlardan sonra ekstrasenslərə inanmaq olar”.
Globalinfo.az
