Hesablama Palatasının Mədəniyyət Nazirliyində apardığı yoxlamalar zamanı çoxsaylı maliyyə pozuntuları aşkarlanıb.
1xeber.media xəbər verir ki,bu barədə Gununsesi.info-ya adıçəkilkən nazirlikdəki mənbə deyib.
Məlumata görə, yoxlamalar zamanı 8 milyon manata yaxın büdcə vəsaitinin müxtəlif MMC-lər vasitəsilə silindiyi məlum olub.
Bildirilir ki, ölkənin siyasi rəhbərliyinin qərarına uyğun olaraq, bu faktlar Baş Prokuror Yanında Korrupsiyaya Qarşı Mübarizə Baş İdarəsinə göndəriləcək.
Bu isə nazir Adil Kərimlinin “vurulması” deməkdir.
Çünki, söhbət bir neçə yüz min manatın yox, 8 milyona yaxın vəsaitin talan olunmasından gedir. Mənbə onu da vurğulayıb ki, nazir Adil Kərimli məsuliyyətdən qurtulmaq üçün komandasından bir neçə nəfəri qurban verməyə hazırlaşır.
Onu da xatırladaq ki, dünən saytımızda Mədəniyyət Nazirliyinin Aparat rəhbəri Mustafa Abbasbəylinin vəzifəsindən kənarlaşdırılacağına dair xəbər yayılıb.
Bildirilir ki, nazir büdcə talanmasına görə daha iki nəfəri günahkar görür.
Hesablama Palatasından Gununsesi.info-nun sorğusuna verilən cavabda isə deyilir:
“Azərbaycan Respublikası Hesablama Palatasına 2025-ci il 9 oktyabr tarixində elektron qaydada daxil olmuş Mədəniyyət Nazirliyində aparılan yoxlamalar zamanı korrupsiya faktlarının aşkarlanması haqqında məlumat əldə etmək barədə sorğunuza “İnformasiya əldə etmək haqqında” Azərbaycan Respublikasının Qanununa uyğun aidiyyəti qaydada baxılmışdır.
Sorğunuza cavab olaraq bildiririk ki, Azərbaycan Respublikası Hesablama Palatası tərəfindən 2025 ci ilin İş Planına əsasən Azərbaycan Respublikası Mədəniyyət Nazirliyində nəzarət tədbiri həyata keçirilir və “Hesablama Palatası haqqında” Azərbaycan Respublikasının Qanununun 22-ci maddəsinə uyğun olaraq audit prosesi davam edir.
Nəzarət tədbirlərinin nəticələri barədə məlumatların təqdim edilməsi “Hesablama Palatası haqqında” Azərbaycan Respublikasının Qanununun 37-ci maddəsinə uyğun olaraq tənzimlənir. Hesablama Palatasının cari il və əvvəlki illərdə keçirdiyi nəzarət tədbirlərinin siyahısı, eləcə də nəticələri barədə məlumatlarla Hesablama Palatasının “Dövlət auditi” rəsmi rüblük məlumat bülleteni, rəsmi internet səhifəsinin (www.sai.gov.az) “Fəaliyyət” bölməsinin “Dövlət auditinin nəticələri” alt bölməsi, eləcə də Hesablama Palatasının yarımillik və illik fəaliyyəti haqqında Hesabatı vasitəsilə tanış ola bilərsiniz.
“Dövlət auditi” rəsmi rüblük məlumat bülleteni Hesablama Palatasının rəsmi internet səhifəsinin “Fəaliyyət” bölməsinin “Dövlət auditi jurnalı” altbölməsində, yarımillik və illik fəaliyyət haqqında Hesabat isə “Hesabatlarımız” altbölməsində yerləşdirilir”.
