Türk Dövlətləri Təşkilatı daxilində xidmət sektorunda sərbəst ticarət anlaşmasının imzalanması planlaşdırılır.
Bu barədə “Report”a müsahibəsində Türk Dövlətləri Təşkilatı (TDT) Baş katibinin müavini Ömer Kocaman danışıb.
O qeyd edib ki, bu istiqamətdə işlərə artıq başlanıb və rəsmilər arasında məsləhətləşmələr aparılır.
“Nəqliyyat, rəqəmsallaşma, kosmik sənaye, enerji və kritik xammal istiqamətində işlər həyata keçirilir. Bu ilin may-iyun aylarında Türkiyədə TDT ölkələri energetika nazirlərinin iclasını keçirəcəyik və orada təmiz enerji, kritik xammal kimi önəmli məsələlər müzakirə olunacaq. Çünki bu məsələlər artıq dünya siyasətində mühüm yer tutur və ölkələrarası münasibətlərə təsir edir, üzv ölkələrimizdə isə kritik xammal kifayət qədər çoxdur”,- Ö.Kocaman əlavə edib.
Müsahib vurğulayıb ki, türk dövlətlərinin təchiz edəcəyi bu xammal sürətlə inkişaf edən kosmik texnologiyada, kvant dünyasında böyük rol oynayacaq:
“Bu mənada biz energetika nazirlərinin görüşündə həmin istiqamətdə işçi qruplarının işini sürətləndirmək üçün addımlar atacağıq. Enerji, gömrük və nəqliyyat növbəti dövrdə əsas diqqət göstərəcəyimiz sahələr olacaq”.
