Dövlət Şəhərsalma və Arxitektura Komitəsində Xocalı soyqırımının 33-cü ildönümü münasibətilə anım tədbiri keçirilib.
1xeber.media xəbər verir ki, Komitə sədri Anar Quliyev çıxışında bu faciənin azərbaycanlılara qarşı etnik təmizləmə siyasətinin ən qanlı səhifələrindən biri olduğunu vurğulayaraq, bir gecədə uşaq, qadın və qoca olmaqla 613 günahsız insanın amansızcasına qətlə yetirildiyini qeyd edib.
O, işğal dövründə xarabalığa çevrilmiş torpaqlarımızın bu gün Azərbaycan Prezidenti, Müzəffər Ali Baş Komandan İlham Əliyevin rəhbərliyi və Rəşadətli Ordumuzun qəhrəmanlığı sayəsində azad olunduğundan sonra həmin ərazilərdə “Böyük Qayıdış” Dövlət Proqramı çərçivəsində tarixi irsimiz və müasir şəhərsalma prinsipləri əsasında genişmiqyaslı bərpa-quruculuq işləri aparıldığını vurğulayıb.
Daha sonra Komitə sədrinin müavini İlqar İsbatov çıxış edərək, Xocalı şəhərinin yeni baş planının layihəsi haqqında ətraflı məlumat verib və şəhərin gələcək inkişaf konsepsiyası çərçivəsində həyata keçiriləcək bərpa və infrastruktur layihələrinin əsas prinsiplərini tədbir iştirakçılarına təqdim edib.
Tədbirdə həmçinin Xocalı faciəsinin dəhşətlərini şahidlərin dili ilə əks etdirən sənədli film nümayiş olunub.
Anım mərasimindən sonra Komitə rəhbərliyi və əməkdaşları “Ana harayı” abidəsini ziyarət edərək, faciə qurbanlarının əziz xatirəsini dərin ehtiramla yad ediblər.
