Bu günlərdə Azərbaycan Respublikasının Baş Prokurorluğu qanunvericiliyə uyğun olaraq ölkə ərazisindən kənarda gizlənən İlqar Hacıyevi, Məhəmməd Mirzəlini, Qurban Məmmədovu, Elşad Məmmədovu, Qabil Məmmədovu, Tural Sadıqlını İstintaq İdarəsinə çağırıb.
Baş Prokurorluqdan verilən rəsmi məlumata görə, Baş Prokurorluğunun İstintaq İdarəsi tərəfindən təqsirləndirilən bu şəxslərə Azərbaycan Respublikası Cinayət-Prosessual Məcəlləsinin 467-13.4-cü maddəsinin tələbinə əsasən rəsmi bildirişlər göndərilib. Onlar bir sıra cinayətlərdə ittiham olunurlar.
Məsələ ilə bağlı Modern.az-a açıqlamasında Milli Məclisin Hüquq siyasəti və dövlət quruculuğu komitəsinin sədri Əli Hüseynli bildirib ki, son vaxtlar Azərbaycandan kənarda özünə yuva qurmuş “söyüş müxalifəti”nin fəal üzvləri bu zamanadək heç bir istəyinə nail ola bilmədiklərini və ictimaiyyətin gözündən düşdüklərini anlayaraq vəziyyətdən çıxış yolu kimi yeni üsullar axtarışına çıxmışdılar:
"Lakin bir neçə ay əvvəl bloger Tural Sadıqlı tərəfindən ortaya atılan və davamlı şəkildə müzakirə etdikləri “xalq parlamenti” ideyasını reallaşdırmaqla gündəmdə qalmağa çalışan “parlamentarilər”in bu arzuları da gözlərində qaldı. Bu qondarma qurumun formalaşmasına ciddi hazırlıq getməsinə baxmayaraq, özlərinin də etiraf etdikləri kimi, “ölü doğulmuş” “xalq parlamenti” növbəti siyasi avantüranın məhsulu kimi yenə də fiaskoya uğradı.
Proseslərin gedişində nəticə etibarı ilə özlərini daha gülünc vəziyyətə qoyan “söyüş müxalifəti”nin məram və məqsədləri və iç üzü daha qabarıq şəkildə özünü göstərdi. Belə ki, xarici emissarlardan maliyyə dəstəyi alan ayrı-ayrı qruplar və şəxslər bir araya gələrək “müxalifət”in siyasi birliyini yaratmaq istəyirdilər. Lakin 11 yanvar tarixində onlayn toplantı zamanı əvvəlcə bir-birlərini tərif edən “söyüş müxalifəti” cəmi bir gün sonra ritorikalarını diametral şəkildə dəyişərək bir-birlərinə qarşı çox sərt şəkildə təhqirə keçdilər. “Söyüş müxalifəti”nin iderliyi uğrunda didişmədə bir-birini ittiham etməyə başlayan hər bir qrupun və şəxsin fərdi ambisiyası və korporativ maraqları planı alt-üst oldu".
O qeyd edib ki, heç bir sosial bazaya malik olmayan və sağlam elektoratdan məhrum olmuşların indiki durumu tam məntiqlidir və nəhayət, Azərbaycan dövlətinin qanunları qarşısında məsuliyyət daşıyan bu şəxslərin taleyi bundan uzağa gedə bilməzdi:
"Şübhə yoxdur ki, yaxın zamanlarda ölkəmizin hüquq-mühafizə orqanları dövlətimizə və dövlətçiliyimizə qara ləkə olan bu psevdomüxalifətçilərin xəyanətkar antiazərbaycan əməllərini obyektiv şəkildə araşdıracaq və günahkarlar layiqli cəzalarını alacaqlar".
