1xeber.media xəbər verir ki, Azərbaycanda uşağın doğulması ilə bağlı ailələrə müxtəlif sosial ödənişlər nəzərdə tutulub. Bu ödənişlər arasında 600 manatlıq birdəfəlik müavinət və uşağa qulluqla bağlı aylıq müavinətlər də var.
Hazırda uşağın anadan olmasına görə 600 manat birdəfəlik müavinət ödənilir. Əkiz və ya daha çox uşaq doğulduqda ödəniş hər uşaq üçün ayrıca hesablanır. Məsələn, əkiz uşaqlar üçün ümumilikdə 1 200 manat ödənilir.
Bu müavinət, bir qayda olaraq, doğum dövlət qeydiyyatına alındıqdan sonra avtomatik təyin edilir və ayrıca müraciət tələb olunmur. Ödənişin statusunu “e-Sosial”, DOST mərkəzi və ya “myGov” vasitəsilə yoxlamaq mümkündür.
Uşağa qulluq edən işləyən valideynlər üçün də aylıq müavinət nəzərdə tutulub. Uşaq 1 yaş 6 aylıq olanadək 44 manat, 1 yaş 6 aydan 3 yaşınadək isə 28 manat ödənilir. Əlilliyi olan uşağa qulluq zamanı bu məbləğ ikiqat verilir.
Aztəminatlı uşaqlı ailələr ünvanlı dövlət sosial yardımı almaq hüququna da malik ola bilərlər. 2026-cı il üçün ehtiyac meyarı adambaşına 300 manat müəyyən edilib. Yardım ailənin gəlirləri və digər şərtlər nəzərə alınmaqla hesablanır.
Ünvanlı sosial yardım üçün “e-Sosial” portalı üzərindən elektron ərizə-bəyannamə təqdim etmək və ya DOST mərkəzinə müraciət etmək mümkündür. Müraciətlərə 15 iş günü ərzində baxılır. Yardım təyin edilərsə, bir il müddətinə ödənilir.
Dövlət Sosial Müdafiə Fondunun məlumatına görə, 2026-cı ilin ilk altı ayında uşağın anadan olması ilə əlaqədar 41 153 nəfərə birdəfəlik müavinət ödənilib. Bu göstərici ötən ilin eyni dövrü ilə müqayisədə 11,4 faiz azdır.
