Ötən gün İran Prezidenti Məsud Pezeşkianın Azərbaycana səfər edəcəyi açıqlandı. Məlumata görə, səfərin aprel ayında baş tutması gözlənilir. Bu, İran prezidentinin ölkəmizə ilk səfəridir.
Bir qədər əvvəl isə Azərbaycan Prezidenti İlham Əliyevlə Məsud Pezeşkian arasında telefon danışığı baş tutdu. Liderlər müxtəlif sahələr üzrə ikitərəfli əməkdaşlığın inkişafını müzakirə etdilər. Həmçinin İran Prezidentinin siyasi məsələlər üzrə müşaviri Mehdi Sənayi Bakıya səfər edərək dövlət başçısı və bir sıra rəsmi şəxslərlə görüşlər keçirdi.
Mövcud geosiyasi proseslər, İran ətrafında artan gərginlik fonunda Pezeşkianın Azərbaycana səfər qərarı necə dəyərləndirilməlidir? Görüş zamanı Zəngəzur dəhlizinin açılması məsələsi də müzakirə edilə bilərmi?
Politoloq Qabil Hüseynli deyib ki, İran Azərbaycanla münasibətləri normallaşdırmaq istəyir:
“Məlum olduğu kimi, İran-Azərbaycan münasibətlərində uzun müddətdir gərginlik hakim idi. Tehran 2025-ci ilin əvvəlindən etibarən Bakı ilə diplomatik təmasları artırıb. Şübhəsiz, məqsəd Azərbaycanla münasibətləri normallaşdırmaqdır.
İran başa düşür ki, ABŞ-la gərginlik gündən-günə artır. Buna görə də, münasibətlərinin gərgin olduğu digər ölkələrlə problemləri həll etməyə çalışır. Əks təqdirdə, ABŞ bundan ustalıqla istifadə edə bilər. Hesab edirəm ki, Məsud Pezeşkianın səfəri ilk növbədə buna hesablanıb.
Sözügedən səfər Azərbaycan üçün məqbuldur. Yəni bizim İranla xüsusi problemimiz yoxdur. Əsasən, gərginlik yaradan tərəf Tehrandır. Lakin indiki məqamda münasibətləri normallaşdırmaq istəyirsə, Bakı buna razıdır”.
Politoloq bildirib ki, Pezeşkianın səfəri Zəngəzur dəhlizi ilə bağlı yeniliyə səbəb ola bilər:
“Pezeşkian İran prezidenti olsa da, qərarvermə mexanizmi onda deyil. Yəni Zəngəzur dəhlizi ilə bağlı Tehranın mövqeyi daha çox ali rəhbər Ayətullah Xameneinin qərarından asılı olacaq. Amma dəyişən şərtlər fonunda İran geri addım ata bilər. Həm münasibətlərin normallaşması və şimaldan gələ biləcək ehtimal təhdidlərin bloklanması, həm də regional əməkdaşlıq üçün dəhlizin açılmasında geri addım atması gözləniləndir. Amma dediyim kimi, hər şey bu ölkənin ali rəhbərindən asılı olacaq”.
Globalinfo.az
