Rusiya prezidenti Vladimir Putinlə Qazaxıstanın birinci prezidenti Nursultan Nazarbayev arasında çoxillik dostluq münasibəti olduğu üçün görüş özəl olub.
1xeber.media xəbər verir ki, bunu Qazaxıstanın keçmiş liderinin mətbuat katibi Aydos Ukibay deyib.
"Media sorğuları ilə əlaqədar sizə məlumat verirəm: Nursultan Nazarbayevin Moskvaya səfəri şəxsi, qeyri-rəsmi olub. Onun və Vladimir Putinin dövlət səlahiyyətlərinin mövcudluğundan asılı olmayaraq, davam edən çoxdankı, dostluq münasibətləri var", - bəyanatda deyilir.
Mətbuat katibi əlavə edib ki, dövlət vəzifələrində olmayan nüfuzlu siyasi xadimlərlə şəxsi görüşlər normal diplomatik təcrübədir və bir sıra digər dünya liderlərinin də Nazarbayevlə əlaqə saxladığını vurğulayıb. Bundan əlavə, Ukibay qeyd edib ki, sabiq prezident Qazaxıstanda daimi yaşayır və onun xaricə getməsi ilə bağlı xəbərlər həqiqətə uyğun deyil.
Rusiya prezidenti Vladimir Putin Nursultan Nazarbayevlə 2025-ci il mayın 29-da görüşüb. Kremlin sözçüsü Dmitri Peskovun sözlərinə görə, Qazaxıstanın keçmiş prezidenti həmin gün Moskvada olub.
