İranın Hörmüz boğazını bağlama ehtimalı yenidən beynəlxalq gündəmin əsas müzakirə mövzusuna çevrilib. İran parlamentinin Təhlükəsizlik Komitəsinin üzvü Esmail Kavatri ölkəsinin təhlükəsizlik səbəbi ilə boğazı gəmiçiliyə bağlaya biləcəyini açıqlayıb. Belə bir addımın neftin qiymətinə necə təsir edəcəyi, ümumi prosesin necə dəyərləndirilməsi və İranın bu istiqamətdə real addım atıb-atmayacağı suallar doğurur.
Globalinfo.az-a danışan Enerji və Neft Araşdırmaları Mərkəzinin sədri İlham Şaban bildirib ki, Hörmüz boğazının bağlanması ehtimalı çox aşağıdır:
“Hörmüz boğazı tamamilə İranın hüquq sahəsi deyil. Onun eni 54 km-dir və bu məsafə üç ölkə arasında İran, Birləşmiş Ərəb Əmirlikləri və Oman arasında bölünüb. Hər iki sahildə 3 km enində nəqliyyat dəhlizi mövcuddur və gəmilərin gediş-gəlişi üçün nəzərdə tutulub. İran yalnız öz iqtisadi zonasında olan hissəni bağlamaq hüququna malikdir, bu isə tankerlərin və yüklərin keçməsinə mane olmayacaq. İran öz hüquqlarını aşarsa, digər iki ölkənin – BƏƏ və Omanın kəskin reaksiyası ilə üzləşəcək. Bu ölkələrin Hind Okeanında böyük və güclü hərbi donanmaları mövcuddur. Bu halda İran ciddi zərbə ala bilər.
İsrail-İran qarşıdurması artıq beşinci gündür davam edir, amma Hörmüz boğazında hər hansı insident baş verməyib. Boğazdan keçən gəmilərdə GPS siqnallarının itməsi müşahidə olunur ki, bu da hərbi əməliyyatlarla əlaqədardır. Gələcəkdə nə baş verəcəyini proqnozlaşdırmaq çətindir.
Dəfələrlə vurğulanmasına baxmayaraq, tarixdə Hörmüz boğazının bağlanması halı qeydə alınmayıb və bazar iştirakçıları buna inanmırlar. Hazırda neftin qiyməti 73 dollardan bir qədər yuxarı səviyyədədir, hər hansı ciddi narahatlıq üçün əsas yoxdur”.
