"Mingəçevirdəki 14 nömrəli məktəbdə qızlara qışda şalvar geyinməyə qoymurlar. Amma şalvarı şagirdlərə aldırıblar".
1xeber.media Axşam.az-a istinadla xəbər verir ki, bu sözləri aparıcı Aytən Səfərova "Xəbər-ertəsi" verilişində deyib.
"Yenə gəldik bu məsələyə, Mingəçevirdə nələr baş verir? Gah deyirlər mütləq 15 manatınız bura gəlməlidir ki, sizə sirkə bilet verək. Bu aydın oldu, səs saldı, yığışdırdılar. Bir ara Astarada, Bakının bir neçə məktəbində belə hallar var idi, nəhayət həllini tapdı. Bu qərarı verən direktor, dövlətdən ağıllıdır? Onda gəlsin Elm və Təhsil Nazirliyində yuxarı başda otursun.
Əziz və hörmətli direktorlar, bəziləri əziz və hörmətli, bəziləri isə sadəcə direktordur. Dövlətin təsdiq etdiyi, Elm və Təhsil Nazirliyindən hər kəsə təlimat göndərilir ki, paltar budur. Qışda qızlar məktəbə şalvarda gələ bilərlər, yayda bəli qızlar şalvar geyinməməlidir, çünki yay forması deyil. Ola bilsin ki, bu direktor özü maşınla gəlir, geyimi istidir, amma elə uşaqlar var ki, bir neçə dayanacaq ayaqla məktəbə gəlirlər. Regiondakı təhsil idarəsindən məktəbə deyilməlidir ki, belə hallar baş verməsin. Bəzi direktorlar özlərini elə aparırlar ki, elə bil məktəbin bünövrəsini bütün qohum əqrabasí töküb. Nənə-babalarının qızıllarını satıb, əziyyətlə tikiblər. Direktor orada təlim-tədris işləri ilə maraqlanmalıdır. Biz hansı əsrdə yaşayırıq ki, qızlar şalvar geyinməməlidir?" - deyə, Aytən Səfərova bildirib.
