Siriya Ərəb Respublikasının keçid dövrü Prezidenti Əhməd Əl Şara iyulun 12-də Azərbaycana işgüzar səfərə gəlib. O, ölkə başçısı İlham Əliyevlə öncə geniş tərkibdə, daha sonra ikili görüş keçirib. Bu fonda ölkəmizin Yaxın Şərq regionundakı aktivliyi diqqət çəkib. Bildirilir ki, son zamanlar Azərbaycan-Suriya münasibətləri güclənir, ölkələr arasında siyasi və diplomatik əlaqələr möhkəmlənir. Bu da regionda rəsmi Bakının rolunu artırır.
1xeber.media xəbər verir ki,Globalinfo.az-a danışan deputat Hikmət Babaoğlu deyib ki, Azərbaycan son dövrlər həyata keçirdiyi strateji siyasi və diplomatik addımlarla 44 günlük müharibədən sonra yaranan yeni reallıqlarda əhəmiyyətli bir keyfiyyət mərhələsi əldə edib:
“Bu, beynəlxalq münasibətlər sistemində ölkəmizin yerini və rolunu artırıb. Bu gün biz Yaxın Şərq və Şimali Afrika kimi dünyanın ən strateji bölgələrində rəsmi Bakının yeni addımlarına şahidlik edirik. Tarixən qurduğumuz böyük dövlətlər və imperiyalar zamanı formalaşan mədəni arealımızın yaratdığı dəyərlər bu gün də həmin strateji coğrafiyada mövcuddur. Beləliklə, Azərbaycan yalnız yeni həmlələr etmir, həm də tarixi və mədəni coğrafiyasına qayıdır. Bu, ölkəmizin böyüməsi və beynəlxalq arenada daha da möhkəmlənməsi deməkdir”.
Deputat qeyd edib ki, bu gün dünyada çox mürəkkəb hadisələr baş verir və yalnız bir istiqamətdə əməkdaşlığın dərinləşməsi dövlətlərin maraq balansını poza bilər:
“Buna görə də dövlət başçısı çoxvektorlu iqtisadi, hərbi və siyasi əlaqələr qurmağa davam edir. Bu yanaşma yeni dünya nizamının tələblərinə uyğunlaşmaq və Azərbaycanın burada güclü və fərqli bir mövqe əldə etməsini təmin etmək məqsədini daşıyır. Ona görə də Suriya ,İraq və Yaxın Şərqin digər aktorları ilə münasibətlər böyük əhəmiyyət kəsb edir. Nəticə etibarilə, bu coğrafiyada yeni status və dəyərlər əsasında milli intibah yaranır”.
Millət vəkili bildirib ki, müharibədən və uzun bir fasilədən sonra Suriyanın böyük inkişaf perspektivləri var:
“Şimali və Orta Afrikada dəyişən statuslar, Klassik Qərb imperializminin Afrikadan geri çəkilməsi, ənənəvi tarixi aktorların bu regiona qayıtması üçün münbit şərait yaradır. Bu baxımdan, başda Misir və Ərəbistan yarımadası olmaqla, Afrikanın mərkəzinə doğru maraqlar balansı qurmaq İlham Əliyevin siyasi, diplomatik həmlələrinin bir hissəsidir. Son dövrlərdə ölkə rəhbərinin həyata keçirdiyi strateji konsepsiya beş il əvvəl qazandığımız statusu daha yüksək keyfiyyət mərhələsinə daşıyır”.
