Tanınmış vəkil Aslan İsmayılov İqtisadiyyat naziri Mikayıl Cabbarova metro və avtobuslarda qiymət artımı ilə bağlı açıq məktub ünvanlayıb.
1xeber.media məktubu təqdim edir:
Azərbaycan Respublikasının İqtisadiyyat naziri, Tarif Şurasının sədri cənab Mikayil Jabbarova
Açıq məktub
Hörmətli Mikayıl müəllim,
Sizin İçərişəhər Qoruğuna rəhbər, daha sonra isə Təhsil naziri təyin ediləndə ən böyük dəstəkçilərinizdən biri olmuşam. Yəqin ki, oxucular da dəfələrlə Sizin müdafiənizə yazdığım məqalələrin şahididirlər. Xüsusilə, Ramiz Mehdiyevin Prezident Administrasiyasının rəhbəri olduğu vaxt Sizə qarşı yönəlmiş addımları ən sərt şəkildə tənqid də etmişəm. Təhsil naziri təyin olunduqdan sonra korrupsiya mənbəyi olan rayon təhsil idarələrini ləğv etmənizi dəstəkləmişdim və buna görə qarşı tərəf məni ictimaiyyətə Sizin komandanın üzvü kimi təqdim edərək haqqımda söyüş kampaniyasına başlamışdı. Bunu çoxları unutmamışdır. Bunları ona görə yazıram ki, son vaxtlar Sizin başçılıq etdiyiniz iqtisadiyyat blokunu ardıcıl tənqid etməyimi qərəz kimi qəbul etməyəsiniz. Mən əminəm ki, bu sahənin bərbad vəziyyətdə olması yaxın vaxtlarda çoxlarının nəzərinə çarpacaq. Əvvəllər bütün iqtisadi göstəricilərə görə Cənubi Qafqazda lider ölkə idiksə, Siz bu sahəyə rəhbərlik etməyə başlayandan sonra artıq sonuncu yerlərdə qərarlaşmışıq. Ən azından bu gün əhali sayına görə ÜDM göstəricilərinə baxmaq kifayətdir.
Hörmətli Mikayıl müəllim,
Sizi bilmirəm, ancaq mənə gün ərzində çoxlu insanlar ağır maddi durumları ilə bağlı müraciət edirlər. Həmin müraciətlərdən birini olduğu kimi Sizə ünvanlayıram: “Yoldaşım qızımı səhər dərsə aparır – 60 qəpik, özü evə qayıdır – 60 qəpik, günorta oğlumu aparır – 60 qəpik, qızımı evə gətirir – 60 qəpik, axşam özü gedib oğlumu götürməyə – 60 qəpik, birlikdə evə qayıdırlar – 60 qəpik. Yoldaşım Koroğlu metrosuna avtobusla gəlir – 60 qəpik, metro ilə Sahilə gedir – 60 qəpik. Axşam Sahildən Koroğluya qayıdır – 60 qəpik, Koroğludan evə avtobus – 60 qəpik. Özüm səhər avtobusla Koroğluya gəlirəm – 60 qəpik, Koroğludan metro ilə Sahilə gəlirəm – 60 qəpik, Sahildən Bayıla avtobusla gedirəm – 70 qəpik. Axşam Bayıldan Sahilə avtobusla – 70 qəpik, Sahildən Koroğluya metro ilə – 60 qəpik, Koroğludan evə avtobusla – 60 qəpik”.
Uşaqlar beş gün məktəbə, ər-arvad isə altı gün işə gedib-gəlirlər. Təxmini hesablamaya görə bu, bir aya 233 manat edir. Bayılda, Bakının Yaşıllaşdırma İdarəsində çalışan fəhlənin aylıq təmiz maaşı 450 manatdır. Ramanada işləyən tibb bacısının maaşı isə 430 manatdır. Ümumi aylıq maaşları 880 manat olan bir ailənin təkcə nəqliyyat xərcləri 233 manat təşkil edir. Bu ailənin Yeni Suraxanıda öz evi var. Bununla belə, vicdanla çalışan bir ailə 647 manatla iki uşağını böyütməlidir. Bundan sonrasını özünüz hesablayın: bu ailənin üzvlərinin və uşaqlarının ən minimal geyimləri olmalıdır, qidalanmalıdırlar, məktəb ləvazimatları almalıdırlar. Mən hələ vaxtilə rəhbərlik etdiyiniz təhsil sahəsinin keyfiyyətinə görə uşaqların hazırlıq kurslarına getmələrini və digər minimal xərcləri demirəm. Qalanını özünüz hesablayın və vətəndaşların vəziyyətini təsəvvür edin.
Hörmətli Mikayıl müəllim,
Məsuliyyət dairənizin həddindən böyük olduğunu bilirəm. Bununla belə, xahiş edirəm, hesablamalardan başqa, özünüz olmasa da, bir məsul işçinizi bir gün ictimai nəqliyyatda hərəkət etdirin və o, insanların əhval-ruhiyyəsinə diqqət yetirib Sizə çatdırsın. Əminəm ki, gördükləri bir çox məsələlərə yenidən baxmağınıza səbəb olacaq.
Bunu Sizə yazmaqda məqsədim odur ki, ölkəmizin ətrafında yaranmış gərgin vəziyyət fonunda bizə qarşı ola biləcək təxribatların qarşısını almaq üçün daxildəki problemlərin də nəzərə alınmasını istəyirəm.
