“Azərbaycan–Özbəkistan əməkdaşlığı həm iqtisadiyyatın müxtəlif sektorlarını, həm də regional təşəbbüsləri əhatə edir. Təbii ki, xüsusən nəzərə alsaq ki, Azərbaycan və Özbəkistan arasında yükdaşımaların həcmi artır”.
Bunu 1xeber.media-ya açıqlama verən Milli Məclisin deputatı, iqtisadçı Vüqar Bayramov deyib.
O qeyd edib ki, ticarət dövriyyəsi 2025-ci ildə 3,2 dəfə artaraq 795 milyon dollara çatıb:
“Bu da, təbii ki, nəqliyyat qovşaqları və nəqliyyat dəhlizləri sahəsində əməkdaşlığın gücləndirilməsi üçün zəmin yaradır. Bu kontekstdə, xüsusən Prezidentin səfəri zamanı müzakirə edilən məsələlər və əldə olunan razılaşmalar fonunda bütövlükdə regional nəqliyyat layihələrinin daha yaxından dəstəklənməsini müşahidə edəcəyik. Bu, təbii ki, həm Azərbaycan və Özbəkistan, həm də bütövlükdə region üçün yeni imkanlar yaradır.
Çünki region üzərindən beynəlxalq yükdaşımaların artması həm region dövlətlərinin gəlirlərinin yüksəlməsinə, həm də bütövlükdə region ölkələrinin geosiyasi mövqelərinin daha da güclənməsinə gətirib çıxaracaq. Bu kontekstdə Prezidentin səfəri regional təşəbbüslərin daha qısa müddətdə və daha səmərəli şəkildə reallaşmasına, sözsüz ki, töhfə verəcək”.
Aysel
