Azərbaycan Prezidenti İlham Əliyev azad edilmiş ərazilərdə Vətən müharibəsinin başa çatmasından dərhal sonra başlanılan genişmiqyaslı quruculuq işlərinin xronologiyası və ideoloji təməlləri barədə mühüm açıqlamalar verib.
1xeber.media xəbər verir ki,dövlət başçısı bildirib ki, Qarabağ və Şərqi Zəngəzurun yenidən qurulması prosesinə rəsmi olaraq 2021-ci ildən start verilib. Həyata keçirilən yüzlərlə infrastruktur layihəsinin arasında dövlətin xüsusi diqqəti ilə bərpa edilən elə ilk obyekt məhz Ağdam məscidi olub.
Prezident İlham Əliyev bu addımın təsadüfi olmadığını, dərin mənəvi və rəmzi məna daşıdığını vurğulayıb. Otuz ilə yaxın işğal dövründə Ermənistan tərəfindən vəhşicəsinə dağıdılan, divarları təhqir olunan tarixi ibadət evinin ilk növbədə bərpa edilməsi Azərbaycan dövlətinin və xalqının öz dininə, milli kimliyinə və mənəvi köklərinə olan sarsılmaz hörmətinin ən bariz göstəricisidir.
