1xeber.media xəbər verir ki, Serbiyanın “Peçat” qəzetində Rusiya Prezidenti Vladimir Putinin Avropa siyasətində dəyişikliklərin baş verməsini gözlədiyi barədə fikir səsləndirilib.
Avropa ölkələrinin hərbiləşməyə üstünlük verməsi və bunun vətəndaşların maraqları hesabına həyata keçirilməsi gələcəkdə Rusiyaya dialoq tərəfdarı olan siyasi qüvvələrin hakimiyyətə gəlməsinə səbəb ola bilər.
Nəşrin müəllifinin fikrincə, Moskva Avropanın Ukraynaya dəstəyinin davam etdiyi bir vaxtda hadisələri sürətləndirmir və Rusiya üçün əsas amillərdən biri səbirdir. Yazıda ABŞ, Fransa və Almaniyada keçiriləcək qarşıdakı seçkilərin Avropanın siyasətinə təsir göstərə biləcəyi bildirilir.
Məqalədə Putinin BRİKS sammitində digər liderlərlə birlikdə ağac əkməsi də simvolik məqam kimi təqdim olunur. Müəllif bu görüntünü gələcəkdə sülhün formalaşacağına dair mesaj kimi şərh edib.
Yazıda həmçinin Rusiyanın Ukraynada hərbi əməliyyatlarını davam etdirməsinin və Avropadakı siyasi proseslərin nəticədə Moskva ilə dialoqa maraqlı qüvvələrin önə çıxmasına gətirə biləcəyi iddia edilir. Bu fikirlər qəzetin müəllifinə məxsusdur.
