1xeber.media xəbər verir ki, Tayvanın xarici işlər naziri Lin Çia-lun ABŞ-ın Arizona ştatına səfər edib.
Səfərin əsas məqsədi Feniks şəhərində Tayvanın yeni faktiki konsulluğu funksiyasını yerinə yetirəcək nümayəndəliyin açılışında iştirak etməkdir. Tayvan Xarici İşlər Nazirliyi yeni ofisin Tayvan-ABŞ iqtisadi və ticarət əlaqələrində mühüm mərhələ olduğunu bildirib.
Vaşinqtonla Taypey arasında rəsmi diplomatik münasibətlər olmasa da, ABŞ Tayvanın əsas beynəlxalq tərəfdaşı və silah təchizatçısı olaraq qalır. Yeni nümayəndəliyin açılması iki tərəf arasında diplomatik, iqtisadi və texnoloji əlaqələrin daha da genişləndirilməsi istiqamətində addım kimi qiymətləndirilir.
Səfər eyni zamanda ABŞ və Çin arasında Tayvan məsələsi ilə bağlı fikir ayrılıqlarının davam etdiyi bir vaxtda baş verir. Pekin dəfələrlə Vaşinqtondan Tayvana silah satışını dayandırmağı tələb edib.
