Ermənistanın Baş naziri Nikol Paşinyan 13 dekabrda Moskvada keçirilən Avrasiya Hökumətlərarası Şurasının iclasında iştirak etdikdən sonra dəyərli hədiyyələr alıb.
1xeber.media xəbər verir ki, bu barədə “Joxovurd” qəzeti yazıb.
Məlumata görə Paşinyan rusiyalı həmkarı Mixail Mişustindən “Qış nağılı” adlı altı nəfərlik çay servisi hədiyyə alıb. Servisin dəyəri 650 min dramdır (1,6 min dollar). Servis İmperator Çini Zavodunun tanınmış rəssamı Aleksey Vorobyovskinin (1906-1992) üslubunda təsvir olunmuşdur. Müəllifin əsərləri Ermitajda, Rusiya Muzeyində və Moskva yaxınlığındakı Kuskovo Keramika Muzeyində saxlanılır.
Özbəkistanın Baş naziri Abdulla Aripov Paşinyana dəyəri 628 min dram (1,5 min dollar) olan “İçan-Qala” adlı mis üzərində oyma işi hədiyyə edib.
Qırğızıstan hökumət başçısı Akılbek Caparov erməni həmkarına Ağrı Dağı ətəyində yerləşən Xor-Virap monastırının təsviri olan tablo hədiyyə edib. Tablo 80 min dram (200 dollar) dəyərindədir.
Paşinyanın Aİİ ölkələrinin hökumət başçılarına nə hədiyyə etdiyi barədə məlumat verilmir.
