2024-cü ildə Bakının mənzil bazarında qiymətlər 2023-cü ilin eyni dövrü ilə müqayisədə 13,3 % artıb.
Bunu 1xeber.media açıqlamasında "Azərbaycan Qiymətləndiricilər Cəmiyyəti" İctimai Birliyinin sədri Vüqar Oruc bildirib.
Önun sözlərinə görə, ötən ilin dekabr ayında isə qiymətlər noyabr ayına nisbətən 1,8 % yüksəlib.
Təkrar mənzil bazarı
V.Oruc bildirib ki, ötən il təkrar mənzil bazarında yeni tikililərin qiymətləri (1 kvadrat metr üçün) əvvəlki illə müqayisədə 12,3 %, ötən ay isə 1,9 % artıb. Köhnə tikililər üzrə bu göstəricilər müvafiq olaraq 10,5 % və 1,5 % təşkil edib.
Bazarda təklifin həcmi də artıb. Müsbət dinamika il ərzində 21 %, dekabr ayında isə 1,6 % olub.
İlkin mənzil bazarı
Onun sözlərinə görə, 2024-cü ildə ilkin mənzil bazarında qiymətlər isə 2023-cü ilə nisbətən 13,8 %, dekabrda isə 2 % artıb.
Bazarda təklifin həcmi isə il ərzində 18 %, dekabrda isə 2 % yüksəlib.
Kirayə bazarı
Kirayə bazarında isə fərqli dinamika müşahidə olunub. Ötən il mənzillərin 1 kvadrat metrinin kirayə qiyməti əvvəlki illə müqayisədə 8,5 % artıb, ötən ay isə 1,6 % azalıb.
Bazarda təklifin həcmi isə il ərzində 17,8 %, dekabr ayında isə 2,4 % yüksəlib.
V.Oruc qeyd edib ki, bu göstəricilər Bakının mənzil bazarında qiymətlərin yüksəliş trendində olduğunu göstərir.
