Dövlətlər tarix boyu müharibələrin, iqtisadi böhranların və siyasi qarşıdurmaların sınağından keçiblər. Lakin zamanın dəyişdirə bilmədiyi bir həqiqət var: Vətənə və dövlətə xəyanət heç vaxt bəraət qazanmır.
Son günlər Almaniyada Prezident İlham Əliyevin rəsmi səfəri zamanı Prezidentin köməkçisi Hikmət Hacıyevin səsləndirdiyi “Həyatda ən ağır yük Vətənə, dövlətə xəyanət etməkdir” fikri cəmiyyətdə geniş rezonans doğurdu. Cəmi bir neçə cümlə uzun illərdir müzakirə olunan bir mövzunu yenidən gündəmə gətirdi.
Əslində, burada söhbət təkcə bir şəxsdən və ya bir dialoqdan getmir. Söhbət dövlətçilik anlayışından, milli kimlikdən və Vətən qarşısında daşıdığımız mənəvi məsuliyyətdən gedir.
Tarix göstərir ki, xəyanət edənlər bəzən qısa müddət üçün özlərini qalib hesab edə bilərlər. Ancaq zaman keçdikcə tarix onların haqqında ən sərt hökmü verir. Çünki dövlətlər şəhidlərinin, qəhrəmanlarının və xalqının yaddaşı üzərində yaşayır. Xəyanət isə heç vaxt həmin yaddaşda şərəfli yer tuta bilmir.
Müasir informasiya müharibələrinin hökm sürdüyü dövrdə hər söz, hər paylaşım və hər çıxış artıq təkcə fikir deyil, həm də məsuliyyətdir. Buna görə də dövlətə, milli maraqlara və cəmiyyətə münasibət hər kəs üçün ciddi meyardır.
Son günlər sosial şəbəkələrdə aparılan müzakirələr də göstərir ki, Azərbaycan cəmiyyətində Vətənə sədaqət, dövlətçilik və milli maraqlar mövzusu həmişə xüsusi həssaslıqla qarşılanır. İnsanlar fərqli siyasi baxışlara malik ola bilərlər, müxtəlif məsələlərdə ayrı düşünə bilərlər. Lakin dövlətin müstəqilliyi, ərazi bütövlüyü və milli maraqları cəmiyyət üçün ortaq dəyər olaraq qalır.
Bəlkə də bu səbəbdəndir ki, “xəyanət” sözü hər səslənəndə insanlar onu sadəcə siyasi ifadə kimi deyil, həm də vicdan, ləyaqət və məsuliyyət anlayışı kimi qəbul edirlər.
Tarix sübut edib ki, insan qazandığı vəzifə ilə deyil, etdiyi seçimlə xatırlanır. Ən çətin seçim isə həmişə Vətənə münasibətdə edilir. Həmin seçimin nəticəsini isə nə sosial şəbəkələr, nə də gündəlik siyasi polemikalar müəyyənləşdirir. Son sözü həmişə tarix deyir.
Müəllif: Tural Əhmədov
