Türkiyə Milli Kəşfiyyat Təşkilatı (MİT) 2013-cü ildə Hatay vilayətinin Reyhanlı rayonunda 53 nəfərin həyatını itirdiyi terror aktının təşkilatçılarından biri olan Temir Dükancını Suriyadan Livana qaçmağa hazırlaşarkən ələ keçirib.
1xeber.media "CNN Türk"ə istinadən xəbər verir ki, Dükancı şəxsən Bəşər Əsəd dövründə Suriya kəşfiyyatı tərəfindən hazırlanıb. Bildirilib ki, Reyhanlı hücumu ilə bağlı aparılan araşdırmalarda qanlı əməliyyatın bilavasitə Əsədin kəşfiyyat rəhbəri tərəfindən idarə edildiyi müəyyən edilib.
Təhlükəsizlik mənbələrindən alınan məlumata əsasən, MİT terror aktında istifadə edilən partlayıcıların dəniz yolu ilə Türkiyəyə gətirilməsində və onların daşınması üçün nəqliyyat vasitələrinin təmin edilməsində iştirak edən Dükancının Suriyada olduğunu müəyyən edib.
Dükancının Livana qaçmağa hazırlaşdığı və burada terrorçu qrupları bir araya gətirərək Türkiyənin xaricdəki diplomatik nümayəndəliklərinə qarşı hücumlar planlaşdırdığı məlum olub. Bundan əlavə, onun saxta pasport əldə etməyə çalışdığı da müəyyən edilib.
Terrorçuların axtarış siyahısında "narıncı kateqoriya"da yer alan Temir Dükancı MİT-in Suriya-Livan sərhədində keçirdiyi xüsusi əməliyyat nəticəsində ələ keçirilib və Türkiyəyə gətirilib. Daha sonra o, Hatay Rayon Polis İdarəsinə təhvil verilib.
Qeyd edək ki, MİT 2018-ci ildə terror aktının digər iştirakçılarından Yusuf Naziki, 2025-ci ilin yanvarında isə Məhəmməd Dib Koralını Suriyada yaxalayaraq Türkiyəyə gətirmişdi.
"CNN Türk"ün xəbər müdiri Nihat Uludağ bildirib ki, MİT son illərin ən böyük əməliyyatlarından birinə imza atıb. Reyhanlı hücumu ilə əlaqədar üç əsas ad müəyyən edilmişdi. Onlardan ikisi daha əvvəl yaxalanmışdı, lakin əsas fiqur - bombanı hazırlayan şəxs - Temir Dükancı idi.
Dükancı 2006-2012-ci illərdə Əsəd dövründə Suriya kəşfiyyatına daxil olub və orada fəaliyyət göstərib. O, birbaşa Suriya Silahlı Qüvvələri və Baş Qərargah Kəşfiyyat İdarəsinin rəhbəri ilə əlaqə quraraq partlayıcı maddələr üzrə xüsusi təlim keçib. Bu biliklərdən Türkiyəyə qarşı istifadə edilib.
Dükancı Suriya kəşfiyyatı və Suriya Prezident Aparatı tərəfindən iki müxtəlif şəxsiyyət vəsiqəsi ilə təmin edilib ki, bu da ona toxunulmazlıq statusu qazandırıb. Hətta ona silah gəzdirmə icazəsi də verilib.
Bu sənədlərin ona verilməsinin əsas səbəbi Türkiyəyə qarşı hücumların təşkilində iştirak etməsidir. MİT-in araşdırmaları göstərib ki, Reyhanlı hücumunda istifadə edilən bombalar Əsəd dövründə Suriyanın Lazkiyədəki hərbi bazalarından dəniz yolu ilə gətirilərək Samandağa çatdırılıb. Hatayda terrorçular tərəfindən əldə edilən nəqliyyat vasitələrində gizlədilib və qanlı hücum həyata keçirilib.
Dükancının terror hücumunun hər mərhələsi barədə Əsədin kəşfiyyat rəhbərinə məlumat verdiyi müəyyən edilib. Hücumun əvvəlcə Ankarada və Konyada planlaşdırıldığı, lakin son anda Reyhanlıda həyata keçirildiyi də məlum olub. Bu əməliyyat, MİT-in Suriyada həyata keçirdiyi uğurlu əməliyyatlar silsiləsinin sonuncusu kimi qiymətləndirilir.
