Aprelin 22-də Hindistanın nəzarətində Cammu və Kəşmir bölgəsində bir qrup silahlı şəxsin turistlərə atəş açması və ən azı 25 nəfərin ölümündən sonra Hindistan və Pakistan arasında gərginlik artıb.
1xeber.media xəbər verir ki, Hindistan bu gün artıq Pakistanla sərhəddəki “Atari” keçid məntəqəsini bağlayıb.
GSSR44 Teleqram kanalı yazıb ki, Pakistan və Hindistan arasında təmas xətti boyunca atəşkəs pozuntuları qeydə alınıb. Hər iki tərəf bir-birini təxribatlarda ittiham edir.
İddiaya görə, turistlərə hücumun məsuliyyətini Pakistan mənşəli qruplaşma öz üzərinə götürüb. Hindistanın Baş naziri Narendra Modi Səudiyyə Ərəbistanına olan səfərini yarımçıq kəsərək geri qayıdıb.
“Hindistan hökuməti Pakistanı terrorizmi dəstəkləməkdə ittiham edərək bəzi müqavilələri ləğv edib və ölkədən pakistanlıların qovulacağını elan edib. Hər iki tərəf aktiv hava kəşfiyyatı aparılır. Tərəflərin hava qüvvələri və qoşunları döyüş hazırlığına gətirilib.
Baş verən hadisələr fonunda Donald Trump Hindistan rəhbərliyinə zəng edərək, Amerikanın dəstəyini ifadə edib.
Pakistan hərbi-siyasi rəhbərliyi isə Hindistanın iddialarını təkzib edib və terror hadisəsindən xəbərlərinin olmadığını bildirib”, - məlumatda qeyd edilib.
