ABŞ prezidenti Donald Tramp görünür, nəhayət, Rusiya lideri Vladimir Putinin onu axmaq yerinə qoyduğunu anlayıb. Bu qənaətə Trampın bazar günü sosial şəbəkələrdəki qəzəbli çıxışları əsas verir.
1xeber.media xəbər verir ki, belə bir fikir "The Telegraph” üçün yazdığı məqalədə Britaniya ordusunun istefada olan polkovniki, NATO-nun kimyəvi, bioloji, radioloji və nüvə təhlükələrinə qarşı sürətli reaksiya qüvvələrinin keçmiş komandanı Hemiş de Bretton-Qordon tərəfindən səsləndirilib.
Tramp bildirib ki, Putinin etdikləri onun xoşuna gəlmir və onu "tamamilə dəli" adlandırıb. Kremlin sözçüsü Dmitri Peskov isə cavabında vəziyyəti daha da qızışdıraraq, Trampın "emosional gərginlikdən" əziyyət çəkdiyini söyləyib.
"Tramp nəhayət, anlayıb ki, ruslar onu axmaq hesab edirlər. İndi artıq onu açıq şəkildə təhrik edirlər və Tramp da gecikmiş olsa da, nə baş verdiyini dərk edib. ABŞ prezidenti gec də olsa anlayıb ki, 'pis uşaqlar' Kiyevdə və Avropanın digər paytaxtlarında deyil, Moskvadadır”, – deyə Bretton-Qordon qeyd edir.
O hesab edir ki, Moskva Trampın lovğalığını və eqosunu düzgün qiymətləndirməyərək böyük səhv edib və bu, Putinin peşman olacağı bir səhv ola bilər. İndi isə ümid yaranıb ki, Tramp Rusiyanı ən çox incidəcək nöqtədən zərbə vurmaq qərarına gələ bilər.
"Rusiyanın ona göstərdiyi açıq hörmətsizlik Trampı qəzəbləndirib və o, sanksiya düyməsinə basaraq Moskvanı əsas gəlir mənbəyindən – neftdən – məhrum edə bilər. Bu isə Rusiya ordusunun və çökən iqtisadiyyatının ayaqda qalmasını mümkünsüz edəcək”, – deyə polkovnik bildirib.
Bretton-Qordon qeyd edir ki, Rusiya iqtisadiyyatı hazırda son dərəcə təhlükəli vəziyyətdədir. Tank istehsalı istisna olmaqla, digər bütün sahələrdə tənəzzül var – lakin tank istehsalı da müharibə itkilərini kompensasiya etmək üçün yetərli deyil.
"Əgər Səudiyyə Ərəbistanı və ABŞ-ın neftin qiymətini 50 dollardan aşağı salmaq təhdidləri gerçəkləşsə, Rusiyanın hərbi maşını yalnız bu ilin sonuna qədər dayanacaq”, – deyə o əlavə edib.
Polkovnikin fikrincə, bu yanaşma Putinlə danışıqlardan daha real sülh imkanı təqdim edir.
"The Wall Street Journal” mənbələrə istinadla bildirib ki, ABŞ prezidenti Donald Tramp bu həftə ərzində Rusiyaya qarşı yeni sanksiyalar tətbiq etməyi nəzərdən keçirir. Bu məhdudiyyətlərin yeni bank sanksiyalarını əhatə etməsi gözlənilmir, lakin Putinə təzyiq göstərmək üçün başqa variantlar, o cümlədən 30 günlük atəşkəs təşəbbüsü müzakirə olunur.
Eyni zamanda, əgər bu sonuncu diplomatik cəhd nəticə verməzsə, Tramp sülh danışıqlarından imtina etməyi də düşünür.
