Maykl Ceksonun qızı Paris Cekson atasının vəfatının ildönümünə təsadüf edən konsert səbəbilə tənqidlərə məruz qaldığını şəxsi bloqunda bildirib.
1xeber.media bu barədə "Yahoo"ya istinadən xəbər verir.
"İnsanlar yenə narazılıq edirlər… Düşünürəm ki, izah etməliyəm: mən tədbirin əsas ifaçısı deyiləm, buna görə də çıxış tarixlərini seçə bilmirəm", deyə Paris qeyd edib.
Onun sözlərinə görə, 25 iyun tarixində o, əsas ifaçıdan əvvəl səhnəyə çıxacaq. Cekson həmin gün böyük bir tədbir planlaşdırmadığını, səhnədə yalnız özünün, gitarasının və nişanlısı Castin Lonqun olacağını bildirib. Müğənni bu çıxışı "sadəcə işini yerinə yetirmək" kimi dəyərləndirib.
2023-cü ildə Paris Cekson görünüşü ilə bağlı tənqidlərə görə sosial şəbəkələrində şərh bölməsini bağlamağa məcbur olmuşdu. Sosial media istifadəçiləri onun Paris Moda Həftəsində "qoca göründüyünü" iddia etmişdilər.
Paris və onun böyük qardaşı Prins Maykl Ceksonun keçmiş tibb bacısı Debbi Rou ilə nikahından dünyaya gəlib. Məşhur müğənni 1996-cı ildə Rou ilə ailə qurmuşdu. Bu hadisə onun Elvis Preslinin qızı Liza-Mari ilə boşanmasından dərhal sonra baş vermişdi. Cütlüyün nikahı isə 1999-cu ildə rəsmən ləğv edilmişdi.
