Lesli-Enn Consun "Love, Freddie" adlı yeni kitabında "Queen” qrupunun solisti Fredi Merkürinin heç kimin bilmədiyi bir qızı olduğu iddia edilir.
1xeber.media bu barədə "The Times" qəzetinə istinadən xəbər verir.
Kitabda qeyd olunur ki, 1976-cı ildə Merküri yaxın dostunun həyat yoldaşı ilə münasibətdə olub və nəticədə "B” hərfi ilə tanıdılan uşaq dünyaya gəlib. Müəllif iddia edir ki, Merküri ata olacağını öyrəndikdən sonra gündəlik yazmağa başlayıb, ölümündən az əvvəl isə bu yazıları həmin şəxsə verib. "B”nin 48 yaşında, Avropada tibb işçisi olduğu, Merkürinin "yeganə övladı və varisi” kimi təqdim edildiyi bildirilir.
Lakin Merkürinin vətəndaş nikahında həyat yoldaşı Meri Ostin bu versiyanı inandırıcı saymır:
"Fredi inanılmaz dərəcədə açıq insan idi. Onun belə bir sevinc xəbərini məndən və yaxınlarından gizlədə biləcəyini təsəvvür etmirəm. Mən heç vaxt uşaqdan da, gündəliklərdən də xəbərdar olmamışam. Əgər onun qızı olsaydı, bu, bizim hamımıza, hətta valideynlərinə də böyük sevinc gətirərdi".
Ostin həmçinin vurğulayıb ki, iddia olunan ilk gündəlik yazısının tarixi - 20 iyun 1976-cı il - hələ onun Merküri ilə birlikdə yaşadığı dövrə təsadüf edir və həmin illərdə o, heç vaxt Fredi yazı yazarkən görməyib. O, Merkürinin ağır xəstəlik mərhələsində gündəlikləri 15 yaşlı "B”yə ötürməsi ehtimalını da şübhə altına alır.
Lesli-Enn Cons isə "B”nin gətirdiyi gündəlikləri Montredə gördüyünü iddia edir, lakin Ostinə yaxın mənbələr bu yazıların mövcudluğuna dair heç bir sübut təqdim edilmədiyini bildirirlər. Bundan başqa, kitabda "B”nin vasiyyət sənədində adının çəkilmədiyi, lakin "xüsusi hüquqi razılaşma” ilə pul aldığı iddia olunur. DNT testi barədə suallara müəllif yalnız "bütün lazımi yoxlamaların aparıldığını, lakin məlumatın şəxsi olduğunu” söyləyib.
