Tədqiqatçılar ehtimal edirlər ki, Yer kürəsindən kənar həyat öz kosmik gəmiləri ilə insanların istifadə etdiyi üsullara bənzər şəkildə ünsiyyət qura və bu siqnallar Yer üzündən də aşkar oluna bilər.
1xeber.media xəbər verir ki, bu barədə "Independent" yazıb.
Yeni araşdırmada alimlər insanlığın yadplanetli ağılın izlərini harada axtarmalı olduğunu müəyyənləşdirməyə çalışıblar. Onlar insanlar tərəfindən kosmik aparatlara göndərilən siqnalları təhlil ediblər və qeyd ediblər ki, oxşar rabitə üsulu uzaq ulduz sistemlərində də baş verə bilər.
Pensilvaniya ştat universitetinin Eberli elmi kollecindən Pinqçen Fan bildirib: "İnsanlar əsasən Mars kimi digər planetləri öyrənmək üçün göndərdiyimiz kosmik gəmilər və zondlarla ünsiyyət qururlar. Lakin belə bir planet bütün ötürülməni bloklamır, buna görə də başqa bir planet və ya kosmik gəmi bu siqnalların keçidini aşkar edə bilər. Bu, planetlərin düzülüşü zamanı baş verir və deməli, yadplanetli mesajların axtarışında belə düzülüşlərə xüsusi diqqət yetirmək lazımdır".
Araşdırmada alimlər NASA-nın uzaq kosmik rabitə şəbəkəsinin qeydlərini təhlil edərək siqnalların hansı istiqamətlərə göndərildiyini araşdırıblar. Nəticədə məlum olub ki, siqnalların çoxu Mars yaxınlığındakı aparatlardan yönəlib. Digərləri isə əsasən digər planetlərə və ya Günəşlə Yer arasındakı Laqranj nöqtələrinə istiqamətlənib.
Mütəxəssislərin qənaətinə görə, yadplanetli kosmik gəmilərdən siqnalları məhz planetlərin bir xətt üzərində düzülüşü olan nöqtələrdə axtarmaq daha məqsədəuyğundur.
Fan əlavə edib ki, son 10–20 ildə çoxlu ekzoplanetlər aşkar olunsa da, bir neçə tranzit ekzoplaneti olan sistemlər hələ az tanınır: "NASA-nın "Nensi Qreys Roman" teleskopunun buraxılışı ilə yüz minə qədər yeni ekzoplanetin aşkar olunacağı gözlənilir və bu, axtarış sahəmizi əhəmiyyətli dərəcədə genişləndirəcək".
