Son dövrlərdə ürək xəstəlikləri və qəfil infarkt hallarının artması diqqət çəkir. Artıq gənc yaşlarda belə ağır ürək problemləri ilə üzləşən insanların sayı çoxalıb.
1xeber.media "Hürriyet"ə istinadən xəbər verir ki, 42 yaşlı bir şəxsin qəfil ürək tutması nəticəsində xəstəxanaya aparılarkən yolda səkkiz dəfə infarkt keçirdiyi bildirilib. Müayinələr zamanı onun üç damarının 80-90 faiz dərəcəsində tutulduğu aşkarlanıb və bir neçə stent qoyulub. Xəstə dörd gün reanimasiyada saxlanılıb. İndi isə ömürlük dərman qəbul etməli və həyat tərzində ciddi dəyişikliklər etməlidir.
Digər bir nümunə 38 yaşlı bir qadının dörd damarının 90 faiz tıxanması nəticəsində bypass əməliyyatı keçirməsidir. Həkimlər onun damarlarının vəziyyətini 80 yaşlı bir insana bənzədiblər. Bu xəstənin də ömürlük dərman istifadəsi və daimi həkim nəzarəti altında yaşaması vacibdir.
50 yaşlı sürücü Kadir G. heç bir ürək xəstəliyi olmadığı halda qəfil infarkt keçirərək yıxılıb. Xəstəxanada dərhal müdaxilə edilərək üç gün reanimasiyada qalıb. Həkimlərin sözlərinə görə, son illərdə belə qəfil infarkt hallarına əvvəl sağlam görünən insanlarda da daha çox rast gəlinir.
Kardioloq prof. dr. Cüneyt Koçaş bildirib ki, təkcə Türkiyədə hər il təxminən 150 min nəfər infarkt keçirir və qan-damar sistemi xəstəlikləri bütün ölümlərin üçdə birindən çoxunu təşkil edir. Dünyada da vəziyyət oxşardır: obezlik, diyabet, siqaret istifadəsi və hərəkətsiz həyat tərzi əsas risk faktorlarıdır.
Onun sözlərinə görə, sağlam qidalanma, müntəzəm idman və stressdən uzaq həyat ürək sağlamlığını qorumağın ən təsirli yollarıdır.
Professor Koçaş risk faktorlarını belə izah edib:
* siqaret istifadəsinin artması,
- obezlik və fast food qidalanma vərdişləri,
*şəhər həyatının gətirdiyi hərəkətsizlik və stress,
* hətta gurultulu mühitin belə ürək sağlamlığına mənfi təsiri,
* genetik meyllilik.
O əlavə edib ki, son illərdə aparılan geniş elmi araşdırmalar koronavirus peyvəndlərinin ürək krizi ilə əlaqəsini təsdiqləmir, əksinə peyvənd olunanlarda riskin azaldığını göstərən nəticələr mövcuddur.
Mütəxəssisin sözlərinə görə, 40 yaşlardan etibarən infarkt riski yüksəlir. Yaşlılarda damar tutulmaları yavaş inkişaf etdiyindən "təbiidir bypass” mexanizmləri zərəri azalda bilir. Lakin gənclərdə qəfil tıxanma ciddi və geniş ürək zədələnməsinə səbəb ola bilər.
