Serbiya Prezidenti Aleksandr Vuçiç etiraf edib ki, Üçüncü Dünya Müharibəsi artıq başlayıb və onun qarşısını almaq çətindir.
1xeber.media xəbər verir ki, o, bunu "Berliner Zeitung" qəzetinə verdiyi müsahibədə bildirib.
Vuçiç vurğulayıb ki, "Neft, qaz, minerallar, nadir metallar və digər xammal uğrunda mübarizə çoxdan başlayıb. Birinci və İkinci Dünya Müharibələrinə nəzər salsaq, görərik ki, hər ikisi əvvəlcə regional münaqişələr kimi başlayıb. Yalnız sonralar böyük hərbi və siyasi ittifaqlar qurulub və nəticədə birbaşa toqquşub".
Onun sözlərinə görə, bu gün də oxşar bir şey müşahidə olunur - müxtəlif geosiyasi bloklar getdikcə daha çox ortaya çıxır. Serbiya prezidenti eskalasiyanın qarşısının alınacağına ümid etdiyini bildirib.
Vuçiç hesab edir ki, "böyük dövlətlərin maraqları çox müxtəlifdir", ölkələr "sadəcə təslim ola bilməzlər" və məhz bu da eskalasiyaya gətirib çıxarır.
