Rusiya Dövlət Dumasının keçmiş deputatı, Sovet ordusunun polkovniki Viktor Alksnis 74 yaşında ölüb.
1xeber.media Rusiya mediasına istinadla xəbər verir ki, bu barədə onun qızı İrina məlumat yayıb.
Məlumata görə, 2019-cu ilin oktyabrında ona xərçəng diaqnozu qoyulub, 30 dekabr 2024-cü ildə polkovnik insult keçirib və komaya düşüb.
Viktor Alksnis 1989-1991-ci illərdə SSRİ xalq deputatı, 1990-1991-ci illərdə Latviya SSR Ali Sovetinin deputatı olub. O, həmçinin 1999-2007-ci illərdə üçüncü və dördüncü çağırış Dövlət Dumasının deputatı seçilib.
O, 1950-ci ildə Kemerovo vilayətinin Taştagöl şəhərində latış-rus ailəsində doğulub. Babası Yakov Alksnis SSRİ xalq müdafiə komissarının aviasiya üzrə müavini vəzifəsində çalışıb və Hərbi Hava Qüvvələrinə rəhbərlik edib. 1938-ci ildə güllələnib. Nənəsi “xalq düşməni”nin arvadı elan edilib, 14 ilini düşərgələrdə və həbsxanalarda keçirib.
Viktor Alksnis 1973-cü ilə qədər Riqa Ali Hərbi Aviasiya Məktəbində hərbi radioelektronika mühəndisi kimi təhsil alıb. Təhsil müəssisəsi onun babasının adını daşıyır.
Viktor Alksnis ictimaiyyət arasında “Qara polkovnik” kimi tanınıb. Bu, onun 1991-ci ildə Sovet İttifaqında Fövqəladə Hallar üzrə Dövlət Komitəsinin (QKÇP) tərəfdarlarını dəstəkləməsi ilə bağlıdır.
