Son zamanlar saxta plastik cərrahlarla bağlı məsələlər ölkə gündəmini zəbt edib. Sənədlərində saxtakarlığa yol verilən bəzi “plastik cərrah”lar məsuliyyətə cəlb olundular, bəzilərinin isə lisenziyaları ləğv edildi. Məsələ ilə bağlı Baş Prokurorluq tərəfindən araşdırmalara başlanıldı. Səhiyyə Nazirliyi plastik cərrahlara sənədlərini təqdim etmək üçün vaxt verdi. Bu müddət də bir neçə gün əvvəl bitdi.
Yenə də, bəzi plastik cərrahların sənədlərində saxtakarlıq aşkarlandı və onların lisenziyaları ləğv edildi.
İndi hər kəsi maraqlandıran bir sual var: Ölkədə bu qədər çox sayda saxta plastik cərrahın olmasının səbəbi nədir?
Mövzu ilə bağlı 1xeber.media açıqlama verən Azərbaycan Demokrat Partiyasının sədri, həkim-ekspert Sərdar Cəlaloğlu bildirib ki, son illərdə ölkəmizdə plastik cərrahiyyəyə maraq artıb:
“Bu da maddi maraqla əlaqəlidir. Məlum olduğu kimi, orada əməliyyatlar üçün çox böyük vəsaitlər sərf olunur. Ona görə də həm professional cərrahlar, həm də saxtakarlıq etmək istəyən adamlar bu sahəyə meyl edirlər.
Sərdar Cəlaloğlu seçkilərdən geri çəkildi - Unikal.az
Azərbaycan səhiyyəsində yaranan problemlərin əsas iki səbəbi var. Bunlardan biri ikili idarəçilik məsələsidir. Bir tərəfdə TƏBİB var, digər tərəfdə Səhiyyə Nazirliyi. Bu iki qurumun ayrı-ayrı fəaliyyət göstərməsinin səbəbi hələ də məlum deyil.
Əslində, Səhiyyə Nazirliyi bütün səhiyyə məsələlərinə cavabdeh olmalıdır. Buna baxmayaraq, hazırda faktiki olaraq bir çox sahələr var ki, Səhiyyə Nazirliyi onlara nəzarət etmir, TƏBİB cavabdehdir. Həkim fəaliyyətinə nəzarət də lazımi səviyyədə deyil”, - deyə o əlavə edib.
ADP sədri hesab edir ki, Azərbaycanda tibbin inkişafı ilə bağlı yanaşma səhvdir:
“Həkimlərin kurslara göndərilməsi, həkim səhvlərinin geniş kollektivlərdə müzakirə olunması və s. kimi vacib məsələlər bizdə yoxdur. Bunlar mütləq olmalıdır ki, həkim səhvləri və cinayətləri aradan qaldırılsın.
Digər səbəb isə, özəl sektora nəzarətin olmaması, bəzi həkimlərin daha çox pul qazanmağa meyl etməsidir. Adam bacardı-bacarmadı, ixtisası oldu-olmadı, əgər pulu varsa, daha çox gəlir gətirən sahəyə meyl edir.
Dövlət və özəl sektorun mövcud olması, onlar arasında sağlam rəaqbətin olmaması, xəstəxanalardakı özbaşınalıqlar, özəl tibb müəssisələrində qiymətlərin dünya bazarından qat-qat yüksək, keyfiyyətin isə aşağı olması hazırkı vəziyyəti yaradır.
Digər tərəfdən, biz bilirik ki, Azərbaycanda apteklər və xəstəxanaların çoxu dövlət məmurlarına məxsusdur. Onlar da inkişafa yox, pul qazanmaqda maraqlıdırlar. Məmurlar da sahib olduqları xəstəxanaların eyiblərini ört-basdır edirlər, oraya hər hansı nəzarət funksiyası olan qurumun girməsinin qarşısını alırlar.
Mənə elə gəlir ki, səhiyyənin problemi həddən artıq ciddidir. Bu qədər saxta sənədlərin ortaya çıxmasının kökündə korrupsiya faktları dayanır. Hamı bilir ki, bir adam qanuni şəkildə ən yüksək ixtisası əldə etsə belə, lisenziya almaq üçün pul vermək lazımdır.
Xüsusilə, səhiyyə sistemində həddən artıq gəlirlər əldə etmək mümkün olduğuna görə, burada böyük korrupsiya var. Bir adam saxta lisenziya alır, sonra gedir milyonlarla pul qazanır. Bu, elə-belə adi həkim fəaliyyəti üçün almır. Pulla həm saxta diplom almaq mümkündür. Həm də, diplomu qanuni olan, amma ixtisası olmayan adamlar da ixtisasını dəyişmək üçün pul verib istənilən ixtisasa keçə bilir”.
