Tədris Cərrahiyyə Klinikasında ağır əməliyyat uğurla icra olunub
Cərrah Adil Cümşüdov 12 yaşlı uşağın qopmuş ayağını yerinə bərpa edib.
Azərbaycan Tibb Universitetinin Tədris Cərrahiyyə Klinikasında ilk dəfə dünyada nadir hesab edilən cərrahi əməliyyat icra olunub. Belə ki, avtoqəza nəticəsində ayağın qopması ilə TCK-ya daxil olan 12 yaşlı Rəmal İsalının ayağı uğurla yerinə bərpa edilib. Əməliyyata klinikanın Plastik cərrahiyyə şöbəsinin müdiri, Ümumi cərrahiyyə kafedrasının assistenti Adil Cümşüdov rəhbərlik edib.
Bu barədə ətraflı məlumat almaq üçün klinikada A.Cümşüdovla görüşdük. Onun sözlərinə görə, avtoqəza nəticəsində xəstənin ayağının amputasiya olunmaq təhlükəsi var imiş: “Çünki xəstəmiz azyaşlı olduğundan damarlarının ölçüləri kiçik idi. Ona görə də bu cür əməliyyatlar, əsasən 16-17 yaşlarda damarların ölçüləri böyüyəndən sonra icra edilir. Xəstənin ayaq damarları ilə əzələ damarının ölçüləri arasında ciddi fərq olduğundan, pasiyentin kiçik damarlarını mikroskop altında 10 dəfə böyüdərək bir-birinə tikə bildik. Əməliyyat 11 saat çəkdi. Çox şükür, əməliyyatdan sonra damarlarda tıxanma halı baş vermədi. Toxuma rahat şəkildə yapışdı, ayaq barmaqları bərpa olundu. Beləcə, ayaq amputasiya olunma təhlükəsindən xilas edildi. Xəstənin ayaq funksiyası 6 aya 90 faiz bərpa olunacaq”.
Əməliyyatın uğurlu keçməsindən çox sevincli olan Rəmalın valideynləri isə həkimə öz minnətdarlıqlarını bildirirdilər.
Atası Mübariz Əliyev məlumat üçün söylədi ki, ötən il dekabrın 28-də “KamAZ” markalı ağır yük avtomobili oğlunun ayağının üstünə çıxıb və əzib: “Ayağı qopduğundan, hansı həkimə müraciət etdiksə, amputasiya olunacağını dedilər. Amma Adil Cümşüdov öz öhdəsinə götürdü. Əməliyyat uğurla həyata keçdi. Oğlumun ayağı kəsilmədi. Mən ona və həkim komandasına özüm və ailəm adından dərin təşəkkürümü bildirirəm. Əgər Adil həkim öhdəsinə götürməsəydi, oğlum ayağını itirəcəkdi. Belə həkimlərimiz var olsun”.
