Prezidentlər səviyyəsində nəqliyyat sahəsində əldə olunan razılaşmalar bizim üçün yol xəritəsidir.
1xeber.media xəbər verir ki, bunu Azərbaycan Baş nazirinin müavini Şahin Mustafayev İranın Milli Günü münasibətilə Bakıda təşkil olunan rəsmi qəbulda deyib.
"Əməkdaşlığımızın əsas istiqamətlərindən biri nəqliyyat sektorudur. 2024-cü ildə Azərbaycan və İran arasında ikitərəfli yükdaşımaların həcmi 20 faiz, tranzit daşımaların həcmi isə 23 faizdən çox artıb. Nəqliyyat sahəsində prezidentlər səviyyəsində əldə olunmuş razılaşmalar bizim üçün bir yol xəritəsidir.
Bu kontekstdə bir sıra qarşılıqlı faydalı layihələr icra olunmuş, digər layihələr üzrə isə səmərəli işbirliyimiz davam etməkdədir.
Avtomobil və dəmir yolları bağlantılarının yaradılması, İran ərazisindən keçməklə Şərqi Zəngəzur–Naxçıvan nəqliyyat infrastrukturunun tikintisi, müvafiq sərhəd-gömrük infrastrukturunun inşası, Naxçıvanla ən qısa əlaqəni təmin edəcək və beynəlxalq nəqliyyat dəhlizlərinin, xüsusilə Şərq-Qərb dəhlizinin inkişafına töhfə verəcək Ağbənd-Kəlalə, eləcə də Siyahrud-Ordubad avtomobil körpüsünün inşası regionun logistika potensialının artırılmasına xidmət edir", - Şahin Mustafayev diqqətə çatdırıb.
Baş nazirin müavini bildirib ki, bu infrastruktur layihələri bölgədə inkişafa və tərəqqiyə xidmət edir: "Şərqi Zəngəzur iqtisadi rayonunu İran ərazisindən keçməklə Naxçıvanla birləşdirəcək elektrik verilişi xəttinin tikintisi layihəsi də mühüm əhəmiyyət kəsb edir.
Bütün bu layihələr “yaşıl enerji” sahəsində əməkdaşlığımızın daha da genişləndirilməsi üçün yeni perspektivlər vəd edir."
