İran Prezidenti Məsud Pezeşkian İslam İnqilabının 46-cı ildönümünə təsadüf edən çıxışında ABŞ-ı etibarsızlıqda ittiham edib və xarici diktənin qəbuledilməz olduğunu bildirib. İranın ali rəhbəri Əli Xameneidə ABŞ-la danışıqları istisna etmişdi. Bununla yanaşı SEPAH da ABŞ-a qarşı barışmaz mövqe tutur.
Bu o deməkdir ki, artıq İranın həm siyasi, həm hərbi, həm də dini qanadı ABŞ-la danışıqlardan, anlaşmadan imtina edib. Bir neçə gün öncə isə ABŞ Prezidenti Donald Tramp İrana maksimum təzyiq kampaniyasına start verib.
Mövcud şərtlər altında bu gərginlik müharibə mərhələsinə keçəcəkmi?
Globalinfo.az-adanışan beynəlxalq münasibətlər üzrə ekspert Əziz Əlibəyli deyib ki, İran-ABŞ münasibətlərinin müharibə mərhələsinə keçməsi üçün ilk növbədə Moskva-Vaşinqton mübarizəsinin nəticəsi bilinməlidir:
“Bu, çox suala cavab olacaq. Əslində, ABŞ-la Rusiya arasında ilkin təmaslar başlayıb. Tərəflərin arasında razılıq əldə edilməsə də, danışıqların olması müsbət hadisədir. Belə olan təqdirdə ABŞ-ın İrana zərbə vurması, ya da müharibə elan etməsi ağlabatan deyil. Ümumiyyətlə, Vaşinqton total müharibədə maraqlı deyil, amma İrana təzyiq davam edir.
Hesab edirəm, ABŞ yaxşı polis, pis polis obrazını uğurla qoruyur. Xameneinin açıqlamaları isə Tehranın radikal mövqeyindən xəbər verir. Bu həm də Pezeşkiana mesaj oldu.
İran üçün əsas problem hazırda valyutasının devalvasiyaya uğramasıdır. Tehranın buna nə qədər dözəcəyi bəlli deyil. ABŞ yumşaq təzyiq metodunu hələ davam etdirəcək. Bu, daha effektivdir”.
