2023-cü ildə “Baku Steel Company”də işləyən Tural İbrahimovu şirkət 3 ay sonra, aprel ayında əsassız yerə işdən azad edib.
1xeber.media xəbər verir ki, bunu Tribunainfo.az-a şəhid övladı Tural İbrahimovun özü bildirib.
O deyib ki, şirkətdən işdən çıxarılması ilə bağlı heç bir açıqlama verilməyib. “Mənə “nə olsun ki, atan Şəhiddir”, dedilər. Sonra da ərizə yazdıraraq, öz xoşumla işdən azad etdilər”.
Qeyd edək ki, 1988-ci il təvəllüdlü Tural İbrahimov Laçın şəhərində anadan olub. Atası, baş Leytenant Zakir İbrahimov 1992-ci ildə Laçın şəhəri uğrunda gedən döyüşlərdə Şəhid olub.
2023-dən bəri işsiz qalan Tural İbrahimovun 6 aylıq körpəsi var. Sosial Müdafiə Fondu onu işsizdir deyə sosial müavinətdən məhrum edib. O bildirib ki, intihar həddində olsa da, körpəsinə görə, səbr edir.
Bildirək ki, Tural İbrahimov 650 bal toplayaraq Azərbaycan Dövlət Neft və Sənaye Universitetinə qəbul olub. Və Biznesin İdarə Edilməsi (MBA) üzrə magistr təhsili alıb. “Peşəkar fəaliyyətim risk, daxili nəzarət, audit və uyğunluq sahələrini əhatə edir. Müxtəlif maliyyə və sığorta təşkilatlarında çalışaraq əməliyyat risklərinin idarə edilməsi, AML (Anti-Money Laundering) nəzarəti, daxili nəzarət sistemlərinin qurulması və audit proseslərinin icrasında geniş təcrübə əldə etmişəm. Karyeram ərzində Dost Agentliyi, Cahan Sığorta Agentliyi, Bank Respublika, Azərbaycan Sənaye Bankı və digər təşkilatlarda müxtəlif rəhbər vəzifələrdə çalışmışam. İş təcrübəmin əsas istiqamətləri risklərin idarə edilməsi, uyğunluq siyasətlərinin formalaşdırılması, daxili nəzarət və audit sistemlərinin qurulması və tənzimləyici tələblərə uyğun fəaliyyətin təmin edilməsi olub.
Azərbaycan, rus, türk və ingilis dillərində sərbəst danışıram”.
Tural İbrahimov deyib ki, Dost Agentliyində ona “torba” tikiblər. “Əvvəlcə müddətsiz müqavilə bağlayıb, daha sonra onu 6 aylıq etdilər. Ardından yerimi dəyişib işdən çıxardılar. 2021-2023 cü ildə isə audit rəhbəri məni işdən çıxardıqdan bir saat sonra işə dəvət edib şiddət göstərdi”.
Şəhid övladı sonda onu da deyib ki, 2023-cü ildə Dost Agentliyi tərəfindən müqaviləsinə əsassız xitam verildikdən sonra bütün dövlət qurumlarına iş üçün müraciət edib. “Hələ də uyğun bir iş yeri tapa bilməmişəm”.
