Bu gün paytaxtın Səbail rayonu ərazisində avtobus qəzası baş verib.
1xeber.media xəbər verir ki, Neftçilər prospektində sükanı arxasında sürücünün olmadığı “Daewoo” markalı avtobus qəfil hərəkətə başlayıb. Nəticədə idarəetmədən çıxan nəqliyyat vasitəsi Bakı bulvarının məhəccərini dağıdaraq park ərazisinə daxil olub.
Hadisə nəticəsində xəsarət alan olmayıb.
***
Azərbaycan Yerüstü Nəqliyyat Agentliyi (AYNA) hadisə barədə məlumat yayıb.
Bildirilib ki, bu gün Neftçilər prospektində qəzaya uğrayan “Daewoo” markalı 10-TG-753 nömrəli avtobus “Fidan” MMC-yə məxsusdur: “İlkin araşdırmalara görə, hadisənin avtobusun texniki nasazlığı səbəbindən baş verdiyi məlum olub. Hadisə nəticəsində xəsarət alan olmayıb. Sərnişindaşıma xidmətinin texniki tələblərinə cavab verməyən avtobusları istismar edən daşıyıcıdan izahat alınıb. Qeyd edək ki, 53 nömrəli marşrut xətti müsabiqəyə çıxarılacaq və avtobuslar yeniləri ilə əvəzlənəcək.
Müsabiqə “Avtomobil nəqliyyatı haqqında” Qanuna, Nazirlər Kabinetinin 2009-cu il 3 aprel tarixli 52 nömrəli qərarı ilə təsdiq edilmiş “Avtomobil nəqliyyatı ilə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarına daşıyıcıların cəlb olunmasına dair müsabiqənin keçirilməsi Qaydası”na uyğun olaraq təşkil edilir”.
