Martın 7-də Lənkəran Şəhər İcra Hakimiyyətinin (ŞİH) başçısı Taleh Qaraşov təqvim planına uyğun olaraq növbəti səyyar qəbul-görüşünü İstisu qəsəbəsinin sakinləri ilə keçirib.
1xeber.media xəbər verir ki, səyyar görüşdə icra aparatının məsul şəxsləri, hüquq-mühafizə orqanlarının, yerli idarə və təşkilatların nümayəndələri iştirak ediblər.
ŞİH başçısı səyyar qəbulun 8 Mart - Beynəlxalq Qadınlar Günü ərəfəsində keçirildiyini, qəsəbə qadınlarının simasında bütün lənkəranlı xanımları təbrik edib.
Taleh Qaraşov bildirib ki, vətəndaşlarla birbaşa dialoqun qurulması, qarşılıqlı etimadın gücləndirilməsi və onları narahat edən məsələlərin həllinə köməklik göstərilməsi məqsədinə xidmət edən səyyar görüşlər dövlət başçısının göstərişinə uyğun olaraq keçirilir. İcra başçısı qeyd edib ki, səyyar qəbul-görüşlərdə qaldırılan bütün məsələlər şəxsən onun nəzarətindədir.
Yerli insanların suallarını və müraciətlərini səbr, təmkin və məmnuniyyətlə dinləyib cavablandıran Taleh Qaraşov qeyd edib ki, cənab Prezident İlham Əliyevin tapşırığına uyğun olaraq vətəndaşların bütün müraciətlərinə həssaslıqla yanaşılır, dərindən təhlil edilir, qaldırılan məsələlər ümumiləşdirilir, həlli üçün uyğun mexanizmlər və təklif irəli sürülür.
İstisu sakinləri səmimi qəbuldan və açıq dialoqdanməmnun qalıblar. Problem və qayğılarının həllinə nail olacaqlarına inamlarını ifadə edən yerli sakinlər dövlət başçısı cənab İlham Əliyevə və Birinci vitse-prezident Mehriban xanım Əliyevaya müraciətlərinə obyektiv və operativ baxıldığına, sosial infrastruktur layihələrinin uğurla həyata keçirildiyinə görə dərin və səmimi minnətdarlıqlarını vurğulayıblar.
