“Cümə günü Ermənistan Baş naziri Nikol Paşinyan növbəti dəfə qapalı iclas keçirib. Hökumət üzvləri və hakim Mülki Müqavilə Partiyasının nümayəndələri də orada olub. Rəsmi açıqlamaya görə, Azərbaycanla sülh prosesi müzakirə edilib”.
1xeber.media xəbər verir ki , Globalinfo.az-ın əldə etdiyi məlumata görə, bunu Ermənistanın “Hraparak” nəşri yazıb.
Məlumata görə, Paşinyan iclasda sülh prosesinin nəticə vermədiyini bəyan edib:
“O deyib ki, Bakı nə iddialardan, nə də dəhliz tələbindən əl çəkir, razılaşmasaq, müharibə qaçılmaz olacaq. Paşinyan bildirib ki, ictimaiyyəti bu barədə fəal şəkildə məlumatlandırmaq lazımdır.
Yeri gəlmişkən, son həftələr Paşinyanın partiyasının üzvləri xüsusən Sünikə (Zəngəzur – red.) fəal səfərlər edir. Məsələn, iqtisadiyyat naziri Gevorq Papoyan ötən həftə iki dəfə səfər edib və sünikliləri müharibə ilə qorxutmaq tapşırığı verib”.
Nəşr bildirir ki, Paşinyanın Zəngəzur dəhlizinin açılmasına razılaşmaqdan başqa yolu olmadığı üçün əhalini müharibə ilə hədələyir.
Qeyd edək ki, Azərbaycan regionda sülh prosesinə sadiqdir. Bakı hər hansı hərbi gərginlikdə və eskalasiyada maraqlı deyil. Bunun müqabilində Ermənistan Qərbdəki havadalarının dəstəyi ilə üzərinə düşən öhdəlikləri yerinə yetirmir və prosesdən müxtəlif bəhanələrlə yayınır.
