Razılaşdırılmış sülh sazişini hələlik “çərçivə sazişi” adlandırmaq daha doğru olar. Çünki bu, iki ölkə arasında hansısa normativ əsaslar yaradır ki, danışıqlar davamlı olsun.
1xeber.media xəbər verir ki,bu sözləri Axar.az-a açıqlamasında politoloq Tofiq Zülfiqarov Azərbaycan və Ermənistan arasında sülh sazişi mətninin razılaşdırılması haqda danışarkən deyib.
Sabiq xarici işlər naziri bildirib ki, bu saziş iki ölkənin gələcəkdə danışıqları beynəlxalq hüquq prinsipləri əsasında aparması baxımından vacibdir:
“Düşünürəm ki, bu, bir təməldir. Bu sazişin qəbul olunması, imzalanması əsasdır. Yaxşı bir siyasi təkan yaradır ki, müxtəlif istiqamətlər üzrə danışıqlar davamlı olsun. Bu istiqamətlərə delimitasiya və demarkasiya, kommunikasiya və ya humanitar mövzu, siyasi məsuliyyət, həmçinin digər məsələlər - məsələn, itkin düşmüş şəxslər, təzminat, eləcə də sülhə mane olan hüquqi aktların ləğv olunması və s. daxildir.
Yəni biz görürük ki, Minsk Qrupu çərçivəsində 26 il ərzində hansısa prinspləri razılaşdırmaq imkanları olmadı. İndi bu prinsplər razılaşdırılıb, bunların əsasında gələcəkdə sülh prosesi davamlı olacaq”.
T.Zülfüqarov bildirib ki, növbəti mərhələ imzalanma məkanı və zamanı ilə bağlı müzakirədir:
“Sazişin Türkiyədə imzalanması əlbəttə ki, gözləniləndir və müsbət hal olardı.
Azərbaycan istəyir ki, Ermənistan öz Konstitusiyasında dəyişikliklər etsin və ərazi iddialarını ana qanunundan çıxartsın. Hər halda bizə sənədin hüquqiliyi və sülh prosesinin uğurlu olması vacibdir. Yəni Nikol Paşinyan vəzifədən getdikdən sona bir başqa şəxs gəlib siyasəti dəyişsə, onda nə olacaq? Ona görə də bizə dayanıqlı sülh lazımdır”.
Gürcü politoloq Gela Vasadze isə bildirib ki, sülh sazişi istənilən məkanda bağlana bilər:
“Müqavilənin imzalanma məkanı ilə bağlı müxtəlif ehtimallar var. Sənəd Azərbaycan-Ermənistan sərhədində də imzalana bilər. Hətta Tiflis də imzalanma üçün münasib yerdir”.
