Rusiya Təhlükəsizlik Şurasının sədr müavini Dmitri Medvedevin son paylaşımı diqqət çəkib. O, bir növ ölkələrin bölgüsünü aparıb.
Sitat: “Menyuda yüngül qəlyanaltılar – Brüssel kələmi, Britaniya balıq və çipsləri və Paris xoruzudur. Əsas yemək Kiyev kotletidir. Nuş olsun!”.
Medvedevin bu sözləri müzakirələrə yol açıb. İddia olunur ki, ABŞ prezidenti Donlad Tramp və rusiyalı həmkarı Vladimir Putinin telefon danışığı Ukrayna və Avropanı bölüşdürməyə xidmət edir və paylaşımın səbəbi də budur.
Bu məsələnin Cənubi Qafqaza nə kimi təhlükəsi var? Bölgü sırası Azərbaycana da çata bilərmi?
Politoloq Vəli Əlibəyov deyib ki, Medvedevin bu paylaşımı diplomatik çevrələrdə geniş yayılmış bir lətifəni təkrarlayır.
Onun sözlərinə görə, bu lətifədə deyilir ki, əgər siz masa arxasında oturmamısınızsa, deməli, menyudasınız:
“Medvedev də bununla demək istəyib ki, dünyanın sonrakı düzənini iki ölkə – ABŞ və Rusiya həll edir, qalanları sadəcə, müzakirə obyektidirlər. Onun sözlərində həqiqət var. Tramp-Putin telefon danışığı bəzi mənbələrə görə 2-3 saat davam edib. Mətbuat üçün açıqlanan məlumatların müzakirəsinə isə 30 dəqiqədən çox vaxt lazım olmazdı. Deməli, Trampla Putin başqa ciddi məsələlər barədə də danışıblar. İstisna etmək olmaz ki, ABŞ-la Rusiya dünyanın yeni siyasi xəritəsini cızıblar”.
Məsələnin Qafqaza çatıb-çatmayacağına gəlincə, politoloq deyib ki, nüfuz dairələrinin bölgüsündə Qafqazın, ələlxüsus da Azərbaycanın xüsusi yeri var:
“Bölgə də, Azərbaycan da müstəsna geosiyasi əhəmiyyətə malikdir, əsas ticarət və enerji yollarının üzərindədirlər. Yəqin ki, müzakirələrdə Azərbaycanın da adı hallanıb. Bəs niyə görə o zaman, Medvedev paylaşımında, məsələn, “Azərbaycan dolması”nı xatırlamayıb? Ona görə ki, hazırda Rusiya üçün önəmli məsələ Ukrayna və Avropadır. Amma onlarla “işlərini bitirəndən” sonra nəzərlərini keçmiş SSRİ dövlətlərinə, o cümlədən, Azərbaycana yönəldə bilərlər”.
Globalinfo.az
