İstanbul Böyükşəhər Bələdiyyəsinin (İBB) sədri Əkrəm İmamoğlu, müavini Mahir Polat və Şişlinin bələdiyyə sədri Rəsul Emrah Şahan, eləcə də daha 4 nəfər barəsində PKK/KCK terror təşkilatına yardım etmək ittihamı ilə ilə başladılan istintaq davam edir.
1xeber.media Türkiyə KİV-ə istinadən xəbər verir ki, İstanbul Baş Prokurorluğunun tələbi ilə “Spectrum House" Düşüncə və Araşdırma Mərkəzi və adları çəkilən şəxslərin bank əməliyyatları ilə bağlı MASAK (Maliyyə Cinayətlərinin Araşdırılması Mərkəzi) tərəfindən hazırlanan hesabat cinayət işinə əlavə olunub.
Hesabatda Əkrəm İmamoğlunun adına müxtəlif yollarla əldə edilən çoxlu sayda daşınmaz əmlakın olduğu qeyd edilib. Onun Balıkəsir, İstanbul-Beylikdüzü, Çanaqqala və Bayramiç rayonlarında 17 daşınmaz əmlakı satış yolu ilə əldə etdiyi, 5 daşınmaz əmlakı isə Həsən İmamoğlunun adına rəsmiləşdirdiyi bildirilir.
Hesabatda İmamoğlunun 2020-2025-ci illər arasında “dələduzluq”, “cinayət törətməyə açıq çağırış”, “ictimai nifrət və düşmənçiliyə çağırış”, “təhdid”, “ədalətli məhkəməyə təsir etmək cəhdi”, “məhkəmə vəzifələrini yerinə yetirən şəxsə təsir etmək”, “vəzifə səlahiyyətlərindən sui-istifadə etmə”, “qeyri-qanuni fəaliyyətlə və ya digər zorakılıq hərəkətləri ilə təhdid etmə”, “qeyri-qanuni hərəkətlərin qarşısının alınması” kimi maddələr üzrə ittiham olunduğu yazılıb.
