Ağcabədi rayonunda 13 yaşlı qızın 23 yaşlı oğlandan hamilə olması ilə bağlı xəbər yayılıb. Məlumata görə, ailələrin razılığı ilə qızın 18 yaşı tamam olanda rəsmi nikah olacaqmış.
Xatırladaq ki, nişan məclisində qızın hamilə qaldığı bilinib. Ailələr evdə yaxın qohumların iştirakı ilə toy məclisi də təşkil ediblər. Hamilə olan qız xəstəxanaya müayinəyə gedən zaman həkimlər bu barədə polisə məlumat veriblər. Buna qədər ailələr məsələni gizli saxlamağa çalışıblar. Faktla bağlı cinayət işi açılıb.
Ağcabədidən deputat seçilmiş Aqil Abbasdeyib ki, yəqin ki, həm 23 yaşlı oğlan, həm də 13 yaşlı qızın valideynləri cəzalanacaq:
“Ağcabədi sakit bir rayondur. Belə hadisələr bu rayonda olmur. Söhbət təkcə Ağcabədidən də getmir. Belə hadisəmi olar? 13 yaşlı qızın 23 yaşlı oğlandan hamilə olması birbaşa cinayətdir. Hesab edirəm, hüquq-mühafizə orqanları məsələ ilə bağlı lazımi araşdırma aparıb, oğlana cəza veriləcək”.
Deputat Tahir Rzayev isə deyib ki, əlbəttə ki, bu bir qəbahət, cinayətdir:
“13 yaşlı qızın ailə qurması qanunaziddir. Başqa tərəfdən baxdıqda, bu bir vəhşilikdir! 13 yaşlı qızla ailə həyatı qurmaq əxlaqsızlıqdır! Bu yaşda bir qız hələ yetkinlik yaşına çatmayıb. Onun necə uşağı olsun? Olan uşağın həyatda qalması da çətindir. Ümumiyyətlə, 13 yaşlı bir insan özü uşaqdır.
13 yaşlı qızla evlənən də, bu işdə iştirak edən ailə də mədəniyyətsizdir. Onu da deyim ki, belə halların olması, xaricə yansıması bir xalq olaraq bizim adımıza da ləkə gətirir. Bizim millətə belə şeylərə görə pis baxırlar.
Mən heyrət edirəm. 13 yaşlı qızı ərə verən ana, ata görəsən, nə düşünür? Onlar heç düşünmürmü ki, balasını zülmə atır? Yenə deyirəm, bu, bir vəhşilikdir. Belə bir işi görən biri insan ola bilməz!”.
Qeyd edək ki, məhkəmə istintaqı dövründə onların övladları dünyaya gəlib. Zərərçəkmiş kimi tanınan 13 yaşlı qız və ailəsi şikayətçi olmayıblar. Onların övladlarının dünyaya gəlməsi də yüngülləşdirici hal kimi nəzərə alınıb.
Məhkəmənin hökmü ilə Şəhriyar (ad şərtidir) barəsində şərti cəza təyin edilib. Həbsdə olan Şəhriyar azadlığa buraxılıb və barəsində polis nəzarətinə verilmə qətimkan tədbiri seçilib.
Globalinfo.az
