Kılıçdaroğlu prezidentliyə namizəd ola və bu dəfə qalib gələ bilər
Türkiyənin Cümhuriyyət Xalq Partiyasının (CHP) sədri Özgür Özel İstanbul Böyükşəhər Bələdiyyəsinin (İBB) sabiq sədri Əkrəm İmamoğlu və digərlərinin həbsinə etiraz edənləri bugün “iqtisadi boykota” çağırıb. O, aprelin 1-i axşamkı paylaşımında “Tələbələrə, analara, atalara, qardaşlara qarşı bu zülmə qarşı gənclərin başlatdığı istehlak boykotunu ürəkdən dəstəkləyirəm. Hər kəsi bu boykota qoşulmağa və istehlakçı gücündən istifadə etməyə dəvət edirəm” deyib. Xüsusilə İstanbulda bir çox kafe, restoran və iş yeri aprelin 2-də qapalı olacaqlarını və satış etməyəcəklərini açıqlayıblar.
Qeyd edək ki, Türkiyə prokurorluğu İstanbul meri Əkrəm İmamoğlunun həbsi fonunda iqtisadi boykot çağırışlarını araşdırır. İstanbul Baş Prokurorluğunun yaydığı açıqlamada qeyd olunur ki, ictimaiyyətin bir hissəsini iqtisadi fəaliyyətlərdən çəkindirməyə yönələn çağırışlarla bağlı istintaq aparılır. Açıqlamada bu çağırışların “nifrət nitqi və ictimai düşmənçiliyin qızışdırılması ilə bağlı qanunların pozulması” ehtimalı əsasında araşdırıldığı qeyd olunub.
Mövzu ilə bağlı Globalinfo.az-a danışan iqtisadçı-ekspert Eldəniz Əmirov bildirib ki, istənilən ölkədə qeyri-stabillik ölkə iqtisadiyyata ciddi zərər vurur:
“Türkiyədə yaşanan hadisə də ölkəyə investisiya həcmlərinin daxil olmasına, inflyasiya göstəricilərinin yüksəlməsinə və s. ciddi iqtisadi təsirlər formalaşdırır. Əgər hazırda boykotla bağlı çağırış edənlərə qarşı təhqiqat başlayıbsa, bu, boykotun təsirlərinin böyük olacağı anlamına gəlir. Amma konkret olaraq bu boykotların nə cür təsir edəcəyi boykotun həcmindən, boykot ediləcək istiqamətlərdən və hansı miqyasda olacağından asılıdır”.
Türkiyədə Qafqaz Strateji Araşdırmalar Mərkəzinin (KAFKASSAM) rəhbəri Prof. Dr. Hasan Oktay isə açıqlamasında bildirib ki, Cumhuriyyət Xalq Partiyası prezident seçkilərindən 3 il əvvəl İstanbul Böyükşəhər Bələdiyyəsinin sədri Əkrəm İmamoğlu vasitəsilə prezidentlik kampaniyasına başladığında Türkiyədə gündəm qəfil dəyişdi:
“Fransada ifrat sağçı siyasətçi Le Pen Avropa fondlarından aldığı yardımı partiyasındakı siyasətçilərə paylamaq əvəzinə mənimsəməkdə təqsirli bilinərkən, Türkiyədə Əkrəm İmamoğlu ilə bağlı məhkəmə prosesi üçün də hüquqi əsas yaranmış oldu. CXP hökumətin həyata keçirdiyi proqramların ədalətsiz və qanunsuz olduğu iddiası ilə Əkrəm İmamoğlu vasitəsilə həyata keçirdiyi küçə nümayişləri və bugünkü iqtisadi boykotla etiraz edir. İmamoğlunun günahkar olub-olmamasına məhkəmələr qərar verəcək, amma görünən odur ki, özünü tələsik prezident elan etmə istəyi və tələbi onun günahkar psixologiyası ilə hərəkət etdiyi fikrini ön plana çıxarıb. Prezident seçkiləri prosesindən özünə siyasi və hüquqi sipər kimi istifadə etmək istədiyi iddia edilən İmamoğlunu hökumət nəzarətdə saxlayaraq bu taktikanın qarşısını alıb”.
Ekspertin sözlərinə görə, hökumətin 25 illik fəaliyyəti istər-istəməz bir kütlə formalaşdırıb və bu kütlə Cümhuriyyət Xalq Partiyasına o qədər də müsbət yanaşmasa da İmamoğlunun timsalında yaranan bu vəziyyət CHP-nin mitinqlərində kütlələri bir araya gətirib:
“Bu, hökumət tərəfindən təhlükəli proses kimi dəyərləndirilir və buna görə də iki günlük Ramazan bayramı tətilini 9 günə qədər uzatdılar. Bununla da kütlənin diqqətini bayrama və tətilə yönəldiblər. Hökumətin bu addımına cavab olaraq CHP də iqtisadi boykot qərarı verdi və hökumətdən narazı olan kütlələr bu gün kəndlərində, şəhərlərində, bölgələrində, vilayətlərində alış-veriş etməyərək, müəyyən mənada hökumət əleyhinə aksiyanı bütün Türkiyəyə yaymaq üçün addım atdılar. Bu, hökumətə qarşı bir addım kimi görünsə də, iqtisadi böhranla üzləşən vətəndaşlar və kommersiya fəaliyyətləri bundan mənfi təsirlənəcək. Bu səbəbdən Cümhuriyyət Xalq Partiyası bunun iqtisadi miqyasını çox da düşünmədən aksiyanı bütün ölkəyə yayıb. Lakin bu iqtisadi böhranın qarşısıalınmaz yüksəlişi qarşısında həyata keçirilən boykot hərəkatı böhranın bir az da dərinləşməsinə və bütün vətəndaşlara mənfi təsir göstərməsinə səbəb oldu”.
H.Oktay qeyd edib ki, Cümhuriyyət Xalq Partiyası İmamoğlunu öz partiyasının namizədi kimi irəli sürərək, Türkiyənin seçici meyllərini nəzərə almadan passiv siyasət həyata keçirdi və bununla da Ərdoğanın yenidən seçilməsi üçün zəmin yaratmış oldu:
“Türkiyədə seçici profilinin 70%-i sağ, 30%-i sola meyllidir, ona görə də Cümhuriyyət Xalq Partiyasının sırf öz 30%-lik kütləsinə arxalanaraq prezident seçkisi keçirmək cəhdi onun bu yarışı əvvəldən uduzması deməkdir. Əvvəlki prezident seçkilərində Cümhuriyyət Xalq Partiyasının lideri Kamal Kılıçdaroğlu altı sağçı partiya ilə ittifaq yaratmasına baxmayaraq, seçkiləri az fərqlə uduzdu. İndi yeni CHP rəhbərliyi hadisələri yaxından izləməklə, küçə etirazları ilə kütləni siyasiləşdirməklə öz sıralarına çəkə bilmədiyi üçün 6 apreldə keçiriləcək qurultayda partiyanın keçmiş sədri Kamal Kılıçdaroğlunun yenidən namizəd olacağı ehtimalı var. Və ola bilsin ki, prezident seçkilərində əvvəlki kiçik taktiki səhvlərə yol verməməklə yeni dövrdə sağçı seçicilərdən səs ala biləcək prezident profili ilə seçkilərdə qalib gəlmək ehtimalı olsun”.
O, yekun olaraq qeyd edib ki, bu iqtisadi boykot iqtidarın daha da sərtləşməsinə və cəmiyyətin qütbləşməsinə səbəb olacağından Cümhuriyyət Xalq Partiyasına o qədər də fayda verməyəcək.
