General Eldar Mahmudovun vəzifəsindən azad edilməsindən, xüsusi xidmət generallarının səs-küylü korrupsiya işi və MTN-in ləğvindən sonra iş adamı və İnformasiya Texnologiyaları(İT) şirkətlərinin sahibi Ayaz Kərimov da cinayət məsuliyyətinə cəlb edilib.
Ona 2015-ci ildə cinayət işi başlanıb və barəsində İnterpol xətti ilə axtarış elan olunub. İstintaq orqanlarının məlumatına görə, Ayaz Kərimov Eldar Mahmudovun oğlu Anar Mahmudovun şəriki olub. O vaxtkı Rabitə Nazirliyinin keçirdiyi bir neçə tenderin qalibi olmuş “Caspian Telekommunications” şirkətinin rəhbəri Ayaz Kərimov sabiq milli təhlükəsizlik naziri Eldar Mahmudovun oğlu Anar Mahmudovla dost olub.
Onların həmçinin biznes şəriki olduqları bildirilir. Rabitə Nazirliyində baş vermiş qanun pozuntuları ilə bağlı başlanılan cinayət işi üzrə Ayaz Kərimovun barəsində 16 dekabr 2015-ci il tarixdə Cinayət Məcəlləsinin 312.2-ci (vəzifəli şəxs tərəfindən bilə-bilə qanunsuz hərəkətlər (hərəkətsizlik) etməyə görə ona rüşvət vermə və ya təkrar rüşvət vermə) maddəsi ilə təqsirləndirilən şəxs qismində cəlb etmə haqqında qərar çıxarılıb, lakin o, cinayət təqibi orqanından gizləndiyinə görə istintaqa dəvət etmək və ona ittihamı elan etmək mümkün olmayıb. Bu səbəbdən də həmin tarixli qərarla barəsində axtarış elan edilib və Binəqədi Rayon Məhkəməsinin 17 dekabr 2015-ci il tarixli qərarı ilə barəsində həbs-qətimkan tədbiri seçilib. Onun Abşeron rayonunda torpaq sahəsi 70 min manat, “Harley Devidson” markalı motosiklet 12.500 manat, “AKEY” MMC-nin adına rəsmiləşdirilmiş “Maserati Quatroporte” markalı avtomobil 155.733.8 manat, “Jaguar XJ” markalı avtomobil 140.529.473 manat məbləğində qiymətləndirilib. İş adamı Ayaz Kərimov uzun illər sonra sükutu pozub.
O, Mahmudovların fəaliyyəti və onların ofşor şirkətlər vasitəsilə ölkədən milyardlarla vəsait oğurlanması sxemindən xəbərdar biridir. Haqqın.az-ın əməkdaşı Azərbaycanda hələ də barəsində cinayət işi olan Ayaz Kərimovla Bolqarıstanın paytaxtı Sofiyada görüşüb. Ayaz Kərimov 2002-ci ildən Kanada vətəndaşıdır.
Bakıda anadan olan biznesmen rus dilində keçən müsahibədə bəzi ilginc iddialar səsləndirib. Məsələn, deyib ki, İnterpol hələ 2018-ci ildə onun barəsində axtarış qərarını ləğv edib, onun indi sərbəst hərəkət etməsi üçün xüsusi çətinlik yoxdur. Amma onu Azərbaycanda hələ də axtarırlar və barəsindəki cinayət işinə xitam verilməyib.
Biznesmen deyib ki, əslində təhdid yolu ilə Mahmudovları onun “Caspian Telekommunications” şirkətinə şərik ediblər. Belə məlum olub ki, biznesmen onun oğlu vasitəsilə o vaxt MTN rəhbəri olan atasına bahalı hədiyyələr də göndərib. Bunlar isə rəsm əsərləri və xalçalar olub. Onun dediyinə görə, Azərbaycanda şərikli işlətdikləri restorana görə vergi borcu Mahmudovun oğlunun onu aldatmasına görə yaranıb, belə ki, onun verdiyi pulları dövlətə ödəməyib. Keçmiş şəriki indi heç bir əlaqələri qalmayan generalın oğlunun ən çox yatırımlarının İspaniya olduğu barədə xəbərləri təsdiqləyib. Onun təxminlərinə görə, Mahmudovlar bir neçə yüz milyonu qanunsuz olaraq ölkədən çıxarıblar. Ayaz Kərimov onu da deyib ki, Eldar Mahmudov vəzifədən çıxarıldıqdan bir neçə il sonra oğlu ilə münasibətləri pisləşib. Onun iddiasına görə, Eldar Mahmodovun oğlu günlərin birində onu Kiprdə hətta döymək də istəyib. Barəsində hələ də cinayət işi və axtarış qərarı olan Ayaz Kərimov Azərbaycana qayıdıb Mahmudovlar haqda gerçəkləri danışmaq istədiyini də istisna etməyib.
“Bakı” Hüquq Şirkətinin rəhbəri Natiq Ələsgərov “Yeni Müsavat”a deyib ki, hər hansı bir cinayətdə iştirak etmiş və ya iştirak etməsi ehtimal olunaraq barəsində cinayət təqibi başlanmış şəxs istintaqla əməkdaşlıq edərsə, onun barəsindəki cinayət təqibinə yenidən baxıla bilər: “Bu məsələ Azərbaycan Respublikasının Cinayət Məcəlləsi və cinayət-prosessual qanunvericiliyi ilə tənzimlənir. Ümumiyyətlə, cinayətdə iştirak etmiş şəxs hüquq-mühafizə orqanlarına könüllü şəkildə məlumat verərsə və cinayətin açılmasına, cinayətin digər iştirakçılarının ifşasına ciddi kömək edərsə, onun cəzasının yüngülləşdirilməsi və ya cinayət məsuliyyətindən azad edilməsi müəyyən hallarda mümkündür”.
Natiq Ələsgərov deyib ki, Azərbaycan qanunvericiliyinə əsasən, Ayaz Kərimov cinayətin açılmasına mühüm kömək göstərərsə, məhkəmə və ya istintaq orqanları onun məsuliyyətdən azad olunmasına qərar verə bilər: “Xüsusilə əgər o, məcbur edilərək cinayətə cəlb olunubsa və ya cinayətin qarşısının alınmasına yardım edibsə, bu, məsuliyyətdən azadolma üçün əsas ola bilər. Əgər onun tam məsuliyyətdən azad edilməsi mümkün deyilsə, o zaman məhkəmə onun cəzasını yüngülləşdirə bilər. Qrup şəklində cinayətin törədilməsində birbaşa iştirak edən şəxs könüllü şəkildə cinayət barədə məlumat verirsə, məlumat verən şəxsə daha az cəza təyin oluna bilər”.
Natiq Ələsgərov deyib ki, bu halda istintaqla əməkdaşlığa gedən şəxslə prosessual müqavilə imzalana bilər: “Müəyyən hallarda şəxslə prokurorluq arasında "dil anlaşması" deyilən razılaşma imzalanması mümkündür. Əgər Ayaz Kərimov mühüm sübutlar təqdim edərsə və ya şahid qismində əsas fiqurların məsuliyyətə cəlb olunmasına kömək edərsə, onun cəzası azaldıla və ya şərti cəza verilə bilər".
Yeni Müsavat
