Azərbaycanda hələ də bir sıra qurumlarda rəhbər postu boş qalıb. Məsələn, Ekologiya və Təbii Sərvətlər Nazirliyi, Nəsimi Rayon İcra Hakimiyyəti belə dövlət orqanlarındandır.
Boş qalan vəzifələrə təyinatlar niyə gecikir? Vəzifələrin bu qədər boş qalması idarəetmədə hansı problemlər yarada bilər?
Ağ Partiya sədri Tural Abbaslı deyib ki, hazırda kadr çatışmazlığı var:
“Bu, ya etimadsızlıq, ya da işbilən kadrların azlığından irəli gəlir. Bəzi şəxslər bir neçə ağır vəzifəni icra edirlər. Düşünürəm ki, bu məsələdə partiyaların fəaliyyətinin ikinci plana düşməsi mənfi mənada rol oynayır. Faktiki olaraq, Azərbaycanda partiyaların işi iflic vəziyyətdədir. Bura bir çox nüanslar daxildir – partiyaların dövlət tərəfindən maliyyələşməsindən tutmuş, bilərək proseslərdən kənarda saxlanılmasına qədər… Belə olan halda, yeni kadrlar kəşf edilmir. Kadrlar necə tapılır? Sorğumu keçirilməlidir və ya müsabiqəmi elan edilməlidir ki, Ekologiya və Təbii Sərvətlər Nazirliyinin postuna adam axtarılır? Düzdür, indi “Yüksəliş Müsabiqəsi” adlı layihə var və insanları ora cəlb etmək istəyirlər. Etiraf edirlər ki, burdakı iştirakçılar kadr bankı kimi saxlanılacaq. Amma belə olmalı deyil. Partiyalar kadrlar yetişdirməlidir. Zamanında təyinatlar olmayanda problemlər müşahidə edilir. İcra başçısı yoxdur, onun müavini düşünmürəm ki, quruma rəhbərlik edə bilsin. Yəqin ki, şikayətçilərə “başçı müəyyən olunanda gəlin”, deyilir. Eynilə nazirlikdə də vəziyyət belədir. Fikrimcə, partiyaların rolu artırılmalıdır”.
REAL partiyasının sədri Natiq Cəfərli isə bildirib ki, Azərbaycanda daha əvvəl də bəzi vəzifələr hətta aylarla boş qalıb:
“Bunlarla bağlı ictimaiyyətə rəsmi açıqlama verilsə, yaxşı olardı. Çünki ən azı spekulyasiyalara son qoyulardı. Güman ki, yaxın zamanlarda boş qalmış yerlərə təyinatlar olacaq. Bu, təbiidir. Həmin təşkilatların işi elə qurulub ki, hətta nazir olmadan belə çalışa bilirlər. Yəni belə təəssürat yaranır. Əlbəttə, vacib postlara təyinatın gecikməsi şayiələrə yol açır”.
Globalinfo.az
