Tibbi könüllü batalyonu “Hospitalyerlər”in ekipaj komandiri Oleq Maqdiç cəbhədən qayıdarkən təmiz “İntersiti” qatarına palçıqlı hərbi çəkmələrlə mindiyi üçün “Ukrzaliznıtsia”dan üzr istəyib.
Bu barədə hərbçi sosial şəbəkə hesabında yazıb.
“Bu, bir neçə saat əvvəl döyüş bölgəsində torpağa basılan ayaqlardır. İndi isə təmiz və səliqəli “İntersiti” vaqonundadır. Və bu ayaqlar sahibinə o qədər utanma hissi verir ki… Bağışlayın, Ukrzaliznıtsia. Növbəti dəfə ayaqqabılarımı daha yaxşı təmizləyəcəyəm”, – deyə hərbçi yazıb.
Onun paylaşımına “Ukrzaliznıtsia”nın cavabı isə sosial şəbəkələrdə geniş rezonans doğurub. Şirkət təmsilçiləri yazıblar:
“Siz üzr istəyirsiniz? Biz isə baş əyirik. Çünki bu çəkmələr – bir rəmzdir. Bizə sülh gətirən müharibənin izi. Sizin qoruduğunuz torpağın çirkidir bu. Bizə təmiz ayaqqabı altı lazım deyil. Bizə canlı Qəhrəmanlar lazımdır. Əgər siz “İntersiti”dəsinizsə, demək ki, biz öz işimizi görmüşük – sizi sülhə çatdırmışıq. Qoy bir neçə saatlıq olsun, bir günlük olsun – amma sülhə.
Siz təşəkkür etməli deyilsiniz. Təşəkkür edən bizik. Hər gün. Hər səfərdə”.
Bu cavab Oleq Maqdiçi kövrəldib. O bildirib ki, cavabı oxuyarkən göz yaşlarını saxlaya bilməyib:
“Oturmuşam, şərhinizi oxuyuram. 3 dəqiqəyə güclə oxudum. Çünki hər cümlədən sonra pəncərəyə baxıb göz yaşlarımı gizlədirdim. Və bu anda kafedən bir oğlan yaxınlaşdı. Müxtəlif şirniyyatlar təklif etdi. Pulsuz. Əsgərlərə təşəkkür olaraq. Ay daa… Siz mənim sinir sistemimə nə edirsiniz belə”, – deyə hərbçi bildirib.
Qeyd edək ki, daha əvvəl “Ukrzaliznıtsia” hərbçilər və onların ailələri üçün qatarlarda xüsusi bilet ehtiyatı ayırdığını açıqlamışdı.
Qaynarinfo
